പാലാ: ചെറിയാൻ ജെ കാപ്പൻ സ്മാരക മുനിസിപ്പൽ സ്റ്റേഡിയത്തിൽ നടക്കുന്ന കേരളാ ഫുട്ബോൾ അസോസിയേഷൻ്റെ ആഭിമുഖ്യത്തിലുളള 47 മത് ഓൾ കേരളാ അണ്ടർ 19 ഇൻ്റർ ഡിസ്ട്രിക്ട് ഫുട്ബോൾ ചാമ്പ്യൻഷിപ്പ് ഫൈനൽ മത്സരത്തിൽ മലപ്പുറം ചാമ്പ്യൻമാരായി. തൃശൂരിനെ മറുപടി ഇല്ലാത്ത 3 ഗോളുകൾക്കാണ് മലപ്പുറം പരാജയപ്പെടുത്തിയത്.
ഇന്നലെ രാവിലെ നടന്ന ലൂസേഴ്‌സ് ഫൈനലിൽ എറണാകുളം വിജയിച്ചു. കോഴിക്കോടിനെ (2-1) യാണ് പരാജയപ്പെടുത്തിയത്. മികച്ച ഗോൾകീപ്പറായി ആദിൽ വി എസ് (കോട്ടയം), ബസ്റ്റ് ഡിഫെൻററായി ഹാമിൻ മുഹമ്മദ് (മലപ്പുറം), ടൂർണ്ണമെൻ്റിലെ മികച്ച കളിക്കാരനായി മുഫ് ലിഹ് (തൃശൂർ) എന്നിവരെ തിരഞ്ഞെടുത്തു. മാൻ ഓഫ് ദ മാച്ചായി മലപ്പുറത്തിൻ്റെ നസീഫ് പി തിരഞ്ഞെടുക്കപ്പെട്ടു.
എ,ബി,സി,ഡി പൂളുകളിലായി കേരളത്തിലെ 14 ജില്ലകളിൽ നിന്നുള്ള ടീമുകളാണ് ചാമ്പ്യൻഷിപ്പിൽ പങ്കെടുത്തത്. ഈ ചാമ്പ്യൻഷിപ്പിൽ നിന്നുമാണ് സംസ്ഥാന ടീമിനെ തിരഞ്ഞെടുക്കുന്നത്. പാലാ സ്പോർട്ട്സ് അക്കാദമിയും ജി.വി. രാജ ഫുട്ബോൾ അക്കാദമിയും സംയുക്തമായിട്ടാണ് ചാമ്പ്യൻ ഷിപ്പിന് ആതിഥ്യമരുളിയത്.
