പത്തനംതിട്ട: യുവതി ഭര്തൃഗൃഹത്തില് തൂങ്ങിമരിച്ച സംഭവത്തില് ഭര്ത്താവിന്റെ സുഹൃത്ത് അറസ്റ്റിലായത് ഫോണ് സംഭാഷണം കേന്ദ്രീകരിച്ചുള്ള അന്വേഷണത്തില്. പൂഴിക്കാട് സ്വദേശി ബിനുകുമാറിന്റെ ഭാര്യ തൃഷ്ണ (27) ആത്മഹത്യ ചെയ്ത സംഭവത്തില് മുളമ്പുഴ സ്വദേശി ശ്രീകാന്താണ് അറസ്റ്റിലായത്. മരണ ദിവസം രാവിലെ തൃഷ്ണയും ബിനുകുമാറിന്റെ സുഹൃത്തായ ശ്രീകാന്തും ഫോണില് സംസാരിച്ച് പിണങ്ങുകയും പെട്ടെന്നുണ്ടായ ദേഷ്യത്തില് തൃഷ്ണ വീടിനുള്ളില് തൂങ്ങി മരിക്കുകയുമായിരുന്നെന്നു പൊലീസ് പറയുന്നു.
ഓഗസ്റ്റ് 30 നാണ് തൃഷ്ണയെ തൂങ്ങിമരിച്ച നിലയില് കണ്ടെത്തിയത്. ബിനുകുമാറും ശ്രീകാന്തും ബി.ജെ.പി പ്രവര്ത്തകരും സുഹൃത്തുക്കളുമാണ്. തൃഷ്ണയും ശ്രീകാന്തും തമ്മിലുള്ള സാമ്പത്തിക ഇടപാടുകളാണ് തൃഷ്ണയുടെ ആത്മഹത്യയിലേക്ക് നയിച്ചതെന്നു പോലീസ് പറഞ്ഞു. അസ്വാഭാവിക മരണത്തിനു പോലീസ് കേസെടുത്തിരുന്നു.
തൃഷ്ണയുടെ മരണത്തില് ബന്ധുക്കള് സംശയം ഉന്നയിച്ചതിനെ തുടര്ന്നാണ് പോലീസ് അന്വേഷണം ഊര്ജിതമാക്കിയത്. ആത്മഹത്യ പ്രേരണാക്കുറ്റം ചുമത്തി അറസ്റ്റ്ചെയ്ത ശ്രീകാന്തിനെ കോടതിയില് ഹാജരാക്കി റിമാന്ഡ് ചെയ്തു.