തകരാറിലായ 11 ലക്ഷം രൂപ വിലയുള്ള കാര്‍ നന്നാക്കാന്‍ ഡീലര്‍ഷിപ്പ് കൊടുത്ത എസ്റ്റിമേറ്റ് കണ്ട് ഉടമ ഞെട്ടി. 22 ലക്ഷം രൂപയുടെ എസ്റ്റിമേറ്റാണ് സര്‍വ്വീസ് സെന്‍റര്‍ നൽകിയത്. ബംഗളൂരുവിലാണ് സംഭവം. ജര്‍മ്മൻ വാഹന നിര്‍മ്മാതാക്കളായ ഫോക്സ്‍വാഗന്‍റെ ജനപ്രിയ ഹാച്ച്ബാക്ക് മോഡലായ പോളോയുടെ ഉടമ അനിരുദ്ധ് ഗണേഷ് എന്നയാള്‍ക്കാണ് ഈ അമ്പരപ്പിക്കുന്ന അനുഭവം. അദ്ദേഹം ലിങ്കിഡ് ഇന്നില്‍ എഴുതിയതാണ് ഇക്കാര്യം.
അടുത്തിടെ, ബെംഗളൂരുവിലുണ്ടായ വെള്ളപ്പൊക്കത്തിൽ അനിരുദ്ധിന്റെ ഫോക്സ്വാഗൺ പോളോ ടിഎസ്‌ഐ കേടായി. വെള്ളപ്പൊക്കത്തിൽ വാഹനം പൂർണമായും മുങ്ങിപ്പോകുകയായിരുന്നു. പിന്നീട് വാഹനം നന്നാക്കാൻ ഗണേഷ് വൈറ്റ്ഫീൽഡിലെ ഫോക്സ്വാഗൺ ആപ്പിൾ ഓട്ടോ സര്‍വ്വീസ് സെന്‍റിലേക്ക് അയച്ചു. രാത്രിയിൽ കാർ ലോറിയില്‍ കയറ്റിക്കൊണ്ടുപോകാൻ ആരും സഹായിക്കാൻ എത്തിയില്ലെന്നും അനിരുദ്ധ് പറഞ്ഞു.
കാർ 20 ദിവസത്തോളം വർക്ക്‌ഷോപ്പിൽ കിടന്നു. പിന്നീട് ഫോക്സ്വാഗൺ ആപ്പിൾ ഓട്ടോ അനിരുദ്ധിനെ വിളിച്ച് 22 ലക്ഷം രൂപയാണ് എസ്റ്റിമേറ്റ് എന്ന് അറിയിച്ചു. അദ്ദേഹം തന്റെ ഇൻഷുറൻസ് കമ്പനിയായ അക്കോയുമായി ബന്ധപ്പെട്ടു. കാർ മൊത്തം നഷ്ടമായി എഴുതിത്തള്ളുമെന്നും സർവീസ് സെന്ററിൽ നിന്ന് വാഹനം വാങ്ങുമെന്നും ഇൻഷുറർ പറഞ്ഞു. എന്നാല്‍ കാറിന്‍റെ രേഖകൾ ശേഖരിക്കാൻ ഷോറൂമിലെത്തിയ ഗണേഷിന് സര്‍വ്വീസ് സെന്‍റര്‍ 44,840 രൂപയുടെ ബില്ല് നൽകി.
തുടർന്ന് അനിരുദ്ധ് ഫോക്‌സ്‌വാഗണുമായി ബന്ധപ്പെടുകയും 48 മണിക്കൂറിനുള്ളിൽ പരിഹാരം കാണുമെന്ന് അവര്‍ വാഗ്ദാനം ചെയ്യുകയും ചെയ്തു. കുറച്ച് ദിവസങ്ങൾക്ക് ശേഷം ഫോക്സ്വാഗൺ കസ്റ്റമർ കെയറിൽ നിന്ന് അനിരുദ്ധിനെ വിളിച്ച് എസ്റ്റിമേറ്റ് കണക്കാക്കാൻ കമ്പനി ഇത്രയും പണം ഈടാക്കുന്നില്ലെന്ന് അറിയിച്ചു. ഡോക്യുമെന്‍റേഷനും മറ്റുമായി 5000 രൂപയുടെ ബില്ല് പിന്നീട് അനിരുദ്ധിന് സര്‍വ്വീസ് സെന്‍റര്‍ നല്‍കി.
തകരാറിലായ വാഹനത്തെക്കുറിച്ച് കാർ സർവീസ് സെന്ററുകൾ ഇൻഷുറൻസ് കമ്പനിക്ക് എസ്റ്റിമേറ്റ് രേഖകള്‍ നൽകേണ്ടതുണ്ട്. ക്ലെയിം പ്രോസസ്സ് ചെയ്യുന്നതിനുള്ള നിയമപരമായ രേഖയായി ഈ പ്രമാണം മാറുന്നു. എസ്റ്റിമേറ്റ് രേഖകൾ നൽകില്ലെന്ന് പറഞ്ഞ് ഇടപാടുകാരെ ഭീഷണിപ്പെടുത്തുന്ന സർവീസ് സെന്ററുകൾ ഏറെയാണ്. എന്തായാലും ഒരു എസ്റ്റിമേറ്റ് രേഖ നൽകുന്നതിനുള്ള തുകയായി ഏതൊരു സേവന കേന്ദ്രത്തിനും വാഹന ഉടമകളില്‍ നിന്ന് ഈടാക്കാവുന്ന ഏറ്റവും ഉയർന്ന പരിധി 5,000 രൂപയാണ് എന്നത് ഈ സാഹചര്യത്തില്‍ ശ്രദ്ധിക്കേണ്ടതാണ്.
തകരാറിലായ വാഹനത്തിന്റെ അറ്റകുറ്റപ്പണിയുടെ ചെലവ് വാഹനത്തിന്റെ പ്രഖ്യാപിത മൂല്യം അഥവാ ഐഡിവിയെക്കാൾ കൂടുതലാണെങ്കിൽ, ഇൻഷുറൻസ് കമ്പനി എല്ലായ്പ്പോഴും കാർ മൊത്തം നഷ്ടമായി എഴുതിത്തള്ളുകയാണ് പതിവ്. വാഹന ഉടമയ്ക്ക് സെറ്റിൽമെന്റ് തുകയായി വാഹനത്തിന്റെ പ്രഖ്യാപിത മൂല്യം ഇൻഷുറൻസ് കമ്പനി നൽകും.
