കോട്ടയം ജില്ലയിലെ കടുത്തുരുത്തി പാലാകരയിൽ അമിതവേഗതയിലെത്തിയ സ്‌കൂട്ടര്‍ ബൈക്കിലിടിച്ച് രണ്ട് പേര്‍ മരിച്ചു. ബൈക്ക് യാത്രികനും സ്‌കൂട്ടര്‍ യാത്രികനുമാണ് മരിച്ചത്. കടുത്തുരുത്തി പാലാകരയിൽ ഇന്ന് രാവിലെ 10 മണിക്കാണ് അപകടം നടന്നത്. ബൈക്കില്‍ എത്തിയ ഞീഴൂര്‍ ഐ.എച്ച്.ആർ.ഡി കോളജ് അധ്യാപകന്‍ വൈക്കം തലയോലപ്പറമ്പ് കാര്‍ത്തിക നിവാസില്‍ അനന്തു ഗോപിയും(28), സ്‌കൂട്ടര്‍ യാത്രികനായ അമല്‍ ജോസഫു(23)മാണ് മരിച്ചത്.
അപകടത്തിൽ പരിക്കേറ്റ ജോബി ജോസിനെ മുട്ടുചിറയിലെ സ്വകാര്യ ആശുപത്രിയിലും രഞ്ജിത് രാജുവിനെ കോട്ടയം മെഡിക്കൽ കോളജ് ആശുപത്രിയിലും പ്രവേശിപ്പിച്ചു.
സ്കൂട്ടറും എതിർദിശയിൽനിന്നുവന്ന ബുള്ളറ്റും കൂട്ടിയിടിക്കുകയായിരുന്നു. സ്കൂട്ടറിൽ മൂന്നു പേരാണ് സഞ്ചരിച്ചിരുന്നതെന്ന് പോലീസ് പറഞ്ഞു. കടുത്തുരുത്തി പോലീസ് സംഭവസ്ഥലത്തെത്തി പരിശോധന നടത്തി. രണ്ടുപേരുടെയും മൃതദേഹങ്ങൾ മുട്ടുചിറയിലെ സ്വകാര്യ ആശുപത്രിയിൽ.
