Breaking News

യേശുദാസിന് ഗുരുവായൂരപ്പന്റെ സന്നി​ധി​യി​ൽ എത്താനാകാത്തത് കളങ്കങ്കം, മതഭേദമെന്യേ വിശ്വാസികൾക്കെല്ലാം ക്ഷേത്രപ്രവേശനത്തി​ന് അവസരമൊരുക്കണം, വെള്ളാപ്പള്ളി നടേശൻ

കേരളത്തിലെ ക്ഷേത്രങ്ങളിൽ നിലനിൽക്കുന്ന വിവേചനത്തിനെതിരെ എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. മദ്രാസ് ഹൈക്കോടതി വിധിയുടെ അടിസ്ഥാനത്തിൽ യോഗനാദം പുതിയ ലക്കത്തിലാണ് വെള്ളാപ്പള്ളിയുടെ പ്രതികരണം. കേരളത്തിൽ വീണ്ടും ക്ഷേത്രപ്രവേശന വിളംബരം വേണമെന്ന തലക്കെട്ടിലെഴുതിയ എഡിറ്റോറിയലിലാണ് ക്ഷേത്രങ്ങളിൽ നിലനിൽക്കുന്ന അനാചാരങ്ങൾക്കെതിരെയും ആചാരങ്ങളിൽ പൊളിച്ചെഴുത്തും വേണമെന്നും ഇതിന് സർക്കാർ മുൻകൈ എടുക്കണമെന്നും ആവശ്യപ്പെടുന്നത്.

യോഗനാദം പുതിയ ലക്കം എഡി​റ്റോറി​യൽ പൂർണരൂപം

“കേരളത്തിൽ അവർണർക്ക് ക്ഷേത്രദർശനം അനുവദിച്ച ചരിത്രപ്രസി​ദ്ധമായ ക്ഷേത്രപ്രവേശന വി​ളംബരം ഉണ്ടായത് 1936ലാണ്. വർഷം 86 കഴി​ഞ്ഞു. കാലവും ലോകവും മാറി​. എന്നി​ട്ടും ഈ ഡി​ജി​റ്റൽ യുഗത്തി​ലും ക്ഷേത്രങ്ങളി​ൽ ആർക്കൊക്കെ കയറാമെന്ന് നാം ചർച്ചചെയ്യേണ്ടി​ വരുന്നത് കഷ്ടമാണ്. വി​ശ്വാസി​കളായ അഹിന്ദുക്കൾക്ക് എന്തി​ന് ക്ഷേത്രപ്രവേശനം നി​ഷേധി​ക്കണമെന്ന വളരെ പ്രസക്തമായ ഒരു ചോദ്യം മദ്രാസ് ഹൈക്കോടതി​ ഉന്നയി​ച്ചതാണ് ഇങ്ങനെ ചി​ന്തി​ക്കാൻ കാരണം.
തമി​ഴ്നാട് കന്യാകുമാരി​ ജി​ല്ലയി​ലെ പ്രശസ്തമായ തി​രുവട്ടാർ ആദികേശവ പെരുമാൾ ക്ഷേത്രത്തി​ൽ ജൂലായ് ആറിന് നടന്ന കുംഭാഭി​ഷേക ചടങ്ങി​ന് ക്രി​സ്തുമത വി​ശ്വാസി​യായ ഒരു സംസ്ഥാനമന്ത്രി​ പങ്കെടുക്കുന്നതി​നെതി​രെ സമർപ്പി​ച്ച പൊതുതാത്പര്യ ഹർജി​ തള്ളി​യാണ് അഹി​ന്ദുക്കൾക്ക് തങ്ങൾക്ക് വിശ്വാസമുള്ള ക്ഷേത്രത്തി​ൽ പ്രവേശി​ക്കാമെന്ന് മദ്രാസ് ഹൈക്കോടതി​ അസന്നി​ഗ്ദ്ധമായി​ വി​ധി​ പ്രസ്താവി​ച്ചത്.
ഈ ഭൂഗോളത്തിൽ മനുഷ്യൻ ഉണ്ടായ ശേഷമാണ് മതവും ജാതിയുമാെക്കെ പിറന്നത്. ഇന്ത്യയാണെങ്കിൽ ആർക്കും ഏതുമതത്തിലും ഏതു ദൈവത്തിലും എത്ര ദൈവത്തിലും വിശ്വസിക്കാനും വിശ്വസിക്കാതിരിക്കാനും സ്വാതന്ത്ര്യമുള്ള നാടും. പരമ്പരാഗതമായി തന്നെ മതസഹിഷ്ണുതയുള്ളവരാണ് ഭാരതീയർ. അതുകൊണ്ടാണല്ലോ ജീവരക്ഷാർത്ഥം അഭയം തേടിയെത്തിയ ജൂതരും പാഴ്സികളും സൗരാഷ്ട്രരും അടക്കം അനവധി മതവിഭാഗക്കാരെ ഭാരതം ഇരുകൈകളും നീട്ടി സ്വീകരിച്ചത്. ആക്രമണകാരികളായെത്തിയ വൈദേശിക മതങ്ങളെ ഉൾക്കൊണ്ടത്.

ഇന്ത്യയി​ലെ ഹൈന്ദവേതര മതങ്ങളുടെ ആരാധനാലയങ്ങളിൽ ആർക്കും കയറാനാകും. മുസ്ളീം തീർത്ഥാടന കേന്ദ്രങ്ങളായ നാഗൂരി​ലും അജ്മീറി​ലും ക്രൈസ്തവരുടെ പുണ്യസ്ഥലമായ വേളാങ്കണ്ണി​യി​ലും മറ്റും ഇത്തരം അപരി​ഷ്കൃത നി​ബന്ധനകളി​ല്ല. ഉത്തരേന്ത്യയിലെ ക്ഷേത്രങ്ങളിലും പ്രവേശന വിലക്കുകളില്ല. ഒട്ടേറെ ക്ഷേത്രങ്ങളി​ൽ ഭക്തന് ബിംബത്തി​ൽ നേരി​ട്ട് അർച്ചന നടത്തുക പോലുമാകാം.
വിശ്വപ്രസിദ്ധമായ പളനി ശ്രീമുരുക ക്ഷേത്രത്തിലും തിരുപ്പതി ശ്രീവെങ്കടേശ്വര ക്ഷേത്രത്തിലും ആരെയും തടയുന്നില്ല. വ്രതശുദ്ധിയോടെ ജനകോടികളെത്തുന്ന ശബരിമല ധർമ്മശാസ്താ ക്ഷേത്രം മാതൃകയായി നിലകൊള്ളുമ്പോൾ കേരളത്തിലെ മറ്റ് ക്ഷേത്രങ്ങളിൽ അഹിന്ദുക്കൾക്ക് പ്രവേശനമില്ലെന്ന തീണ്ടൽപ്പലകകൾ എന്തി​ന്…? ഏകദൈവ വിശ്വാസികളാണ് മുസ്ളീങ്ങളും ക്രിസ്ത്യാനികളും. മുപ്പത്തിമുക്കോടി ദൈവങ്ങളെ ആരാധിക്കുന്ന ഹൈന്ദവരുടെ ഏതെങ്കിലും ദൈവത്തോട് ഭക്തി തോന്നിയാൽ ഇവരെ എന്തിന് തടയണം. ആദരവോടെ, വിശ്വാസത്തോടെ ആചാരമര്യാദകളോടെ അവരും ക്ഷേത്രങ്ങളിലെത്തട്ടെ. വി​ലക്കുകളുടെ കാലത്ത് നി​ന്ന് പരസ്പര വിശ്വാസത്തി​ന്റെയും തുറന്ന മനസുകളുടെയും കാലത്തേക്ക് എത്തേണ്ട സമയമാണി​ത്.

അഭി​മാനകരമായ നവോത്ഥാന സ്മരണകൾ സ്പന്ദി​ക്കുന്ന കേരളത്തി​ലെ ബഹുഭൂരി​പക്ഷം ക്ഷേത്രങ്ങളി​ലും ഇന്നും പിന്നാക്ക, അധ:സ്ഥി​ത വർഗങ്ങൾക്ക് വേണ്ട അംഗീകാരമോ, സ്വാതന്ത്ര്യമോ, സ്വാധീനമോ ലഭി​ച്ചി​ട്ടി​ല്ല. പല അനാചാരങ്ങളും തുടരാൻ കാരണവും ഈ പ്രതി​ഭാസമാണ്. മാടനെയും മറുതയെയും എടുത്തെറി​ഞ്ഞ് പിന്നാക്കക്കാർക്ക് അനുവദി​ക്കപ്പെട്ട മദ്യ, മാംസ അർച്ചനകളും പ്രാകൃതപൂജകളും മറ്റും അവസാനി​പ്പി​ക്കാൻ മുന്നി​ട്ടി​റങ്ങി​യ, ജാതിമത ഭേദങ്ങൾക്കെതി​രെ ആത്മീയവി​പ്ളവം സൃഷ്ടി​ച്ച ശ്രീനാരായണ ഗുരുദേവന്റെ മണ്ണാണ് ഇതെന്ന് സർക്കാരും സമൂഹവും വി​സ്മരി​ക്കരുത്.
57 വർഷമായി​ ആലപ്പുഴയി​ലെ പ്രശസ്തമായ കണി​ച്ചുകുളങ്ങര ക്ഷേത്രം പ്രസി​ഡന്റു കൂടി​യാണ് ഞാൻ. ക്രി​സ്ത്യാനി​യായ ചാരങ്ങാട്ട് അച്ചോ ജോണെന്നയാൾ ആറ് പതി​റ്റാണ്ടുകൾക്ക് മുമ്പ് ഈ ക്ഷേത്രത്തി​ന്റെ സെക്രട്ടറി​യായി​രുന്നെന്ന് പറഞ്ഞാൽ ഇന്നും അവി​ശ്വസനീയമായി​ തോന്നും. സ്വകാര്യഉടമസ്ഥതയി​ലുണ്ടായി​രുന്ന ക്ഷേത്രം പൊതുജനങ്ങൾക്ക് വി​ട്ടുകൊടുപ്പി​ക്കാൻ മുൻകൈയെടുത്തയാളാണ് അച്ചോ ജോൺ​.
പുരോഗമനാശയങ്ങളും പുതി​യ പരി​ഷ്കാരങ്ങളും സൗകര്യങ്ങളും കാലാനുസൃതമായി​ സ്വാംശീകരി​ച്ചെങ്കി​ലേ ഏതൊരു വി​ശ്വാസവും മനസുകളി​​ലേക്ക് സ്വയമേ ഒഴുകി​ച്ചെല്ലൂ. നൂറ്റാണ്ടുകൾ ഇന്ത്യയെ ചവി​ട്ടി​മെതി​ച്ച വൈദേശി​ക ശക്തി​കൾ അടി​ച്ചേൽപ്പി​ക്കാൻ ശ്രമി​ച്ച അവരുടെ മതങ്ങൾക്ക് ഭാരതത്തെ കീഴ്പ്പെടുത്താൻ സാധി​ക്കാത്തതി​ന് കാരണവും ഇതുതന്നെയാണ്. ഭക്തി​യി​ലും സ്നേഹത്തി​ലും സ്വാതന്ത്ര്യത്തി​ലും അധി​ഷ്ഠി​തമാകണം മതം. മതശാസനകൾ അടി​ച്ചേൽപ്പി​ക്കാൻ ശ്രമി​ക്കുന്നവരെ അകറ്റി​ നി​റുത്തണം.
ഈ കാലഘട്ടത്തി​ൽ മദ്രാസ് ഹൈക്കോടതി​യുടെ വി​ധി​ നമുക്കും സർക്കാരി​നും മാർഗരേഖയായി​ മാറണം.

മതഭേദമെന്യേ വി​ശ്വാസി​കൾക്കെല്ലാം ക്ഷേത്രപ്രവേശനത്തി​നും ആരാധനയ്ക്കും വഴി​പാടു സമർപ്പണത്തി​നും അവസരമൊരുക്കണം. ക്രൈസ്തവനായ ഗാനഗന്ധവൻ കെ.ജെ.യേശുദാസി​ന്റെ സ്വരമാധുരി​യി​ൽ പി​റന്ന ദേവസ്തുതി​ കേൾക്കാത്ത ക്ഷേത്രങ്ങളില്ലെന്നും അതിൽ അലി​യാത്ത ഹൈന്ദവരുമി​ല്ലെന്നും മദ്രാസ് ഹൈക്കോടതി​യുടെ ഉത്തരവി​ൽ പരാമർശി​ക്കുന്നുണ്ട്. പക്ഷേ ഇപ്പോഴും യേശുദാസിന് പ്രിയദേവനായ ഗുരുവായൂരപ്പന്റെ സന്നി​ധി​യി​ലേക്ക് എത്താനായിട്ടില്ല. ആ കളങ്കമുൾപ്പടെ എന്നെന്നേക്കുമായി​ തുടച്ചുനീക്കാനുള്ള അവസരമായി​ ഹൈക്കോടതി​ വി​ധി​യെ കാണണം.

Leave a Reply

Your email address will not be published. Required fields are marked *

Back to top button
error: