ടെക്നോപാർക്കും ഇൻഫോ പാ൪ക്കും അടക്കമുള്ള സംസ്ഥാനത്തെ ഐടി മേഖലകളിൽ പബുകൾ ഉൾപ്പെടെയുള്ള പ്രത്യേക മദ്യശാലകൾ ആരംഭിക്കണമെന്ന നിർദേശം അടക്കമുള്ള മദ്യനയത്തിന്‍റെ കരടിന് സിപിഎം സംസ്ഥാന സെക്രട്ടേറിയറ്റ് അംഗീകാരം നൽകി.
കൂടുതൽ മദ്യവിൽപനശാലകൾ ആരംഭിക്കണമെന്ന നിർദേശവും ഭേദഗതികളോടെ അംഗീകരിച്ചു. സ്ഥലസൗകര്യമുള്ളിടത്ത് ജനങ്ങളെ ബാധിക്കാത്ത തരത്തിൽ പുതിയ മദ്യ വിൽപനശാലകൾ തുറക്കാം. ബാർ, ക്ലബ് ലൈസൻസ് ഫീസുകൾ വർധിപ്പിക്കും.
തെങ്ങുകളുടെ എണ്ണം പെരുപ്പിച്ചു കാട്ടി വ്യാജക്കള്ള് വിൽക്കുന്നത് തടയാൻ ട്രാക്ക് ആൻഡ് ട്രെയ്സ് സംവിധാനം കൊണ്ടുവരും. വീര്യം കുറഞ്ഞ മദ്യം പഴവർഗങ്ങളിൽ നിന്നും മരച്ചീനിയിൽ നിന്നും ഉത്പാദിപ്പിക്കുന്നതിന് കർഷകർക്കുള്ള ആനുകൂല്യങ്ങളും മദ്യനയത്തോടൊപ്പം പ്രഖ്യാപിക്കും. അടുത്ത മന്ത്രിസഭയിൽ മദ്യനയത്തിന്‍റെ കരട് ച൪ച്ച ചെയ്ത് ആവശ്യമായ മാറ്റങ്ങളോടെ അംഗീകരിക്കും. ഏപ്രിൽ ഒന്നിന് മദ്യനയം നിലവിൽ വരും.
