ഒറ്റപ്പെട്ട അവസ്ഥയില്‍ സ്ത്രീകള്‍ക്ക് അതിക്രമം നേരിടേണ്ടി വന്നാല്‍ എങ്ങനെ പ്രതികരിക്കാം എന്നതാണ് ‘അടിതട’ എന്ന പരിശീലന പരിപാടി. ഈ സ്വയംപ്രതിരോധ പാഠങ്ങള്‍ സോഷ്യല്‍ മീഡയയിലൂടെ സ്ത്രീകൾക്ക് പഠിക്കാം
തിരുവനന്തപുരം: സ്ത്രീകള്‍ക്കെതിരെയുള്ള അതിക്രമങ്ങള്‍ തടയുന്നതിനു വേണ്ടി പ്രതിരോധ പരിശീലന പരിപാടിയുമായി കേരളാ പൊലീസ്. സോഷ്യല്‍ മീഡയയിലൂടെ സ്ത്രീകൾക്ക് ഈ പരിശീലന പരിപാടി പഠിക്കാം.
ഒറ്റപ്പെട്ട അവസ്ഥയില്‍ സ്ത്രീകള്‍ക്ക് അതിക്രമം നേരിടേണ്ടി വന്നാല്‍ എങ്ങനെ പ്രതികരിക്കാം എന്നതിനെക്കുറിച്ച് കേരളാ പൊലീസ് സോഷ്യല്‍ മീഡിയ സെല്‍ തയ്യാറാക്കിയ ‘അടിതട’ എന്ന സ്വയംപ്രതിരോധ പാഠങ്ങള്‍ ഉള്‍ക്കൊളളിച്ചുകൊണ്ടുളള ട്യൂട്ടോറിയല്‍ വിഡിയോ ഇന്ന് (വ്യാഴം) കേരളാ പൊലീസിന്‍റെ ഔദ്യോഗിക സോഷ്യല്‍ മീഡിയ പ്ലാറ്റ്ഫോമുകളില്‍ റിലീസ് ചെയ്യും.
പെണ്‍കുട്ടികള്‍ക്കും സ്ത്രീകള്‍ക്കും ഏറെ പ്രയോജനപ്പെടുന്ന ഈ പദ്ധതി കേരളാ പൊലീസ് സോഷ്യല്‍ മീഡിയ സെല്‍ നോഡല്‍ ഓഫിസര്‍ കൂടിയായ എ.ഡി.ജി.പി മനോജ് എബ്രഹാമിന്‍റെ നേതൃത്വത്തിലാണ് തയാറാക്കിയത്. സ്ത്രീകള്‍ക്കെതിരായ അതിക്രമങ്ങള്‍ വർധിച്ചുവരുന്ന സാഹചര്യത്തില്‍ അത്തരം അതിക്രമങ്ങള്‍ തടയുന്നതിനായി കേരളാ പൊലീസ് നിരവധി പദ്ധതികള്‍ ആവിഷ്ക്കരിച്ചിട്ടുണ്ട്.
സ്വയം പ്രതിരോധം തീർക്കുന്നതിനായി കേരളാ പൊലീസ് വനിതാ സ്വയംപ്രതിരോധ സംഘത്തിന്‍റെ നേതൃത്വത്തില്‍ സ്വയം പ്രതിരോധ പരിശീലനം എല്ലാ ജില്ലകളിലും കഴിഞ്ഞ നിരവധി വര്‍ഷങ്ങളായി സൗജന്യമായി നല്‍കി വരുന്നു.
സോഷ്യല്‍മീഡിയ സെല്ലിലെ പൊലീസ് ഉദ്യോഗസ്ഥന്‍ അരുണ്‍ ബി.ടിയുടേതാണ് ട്യൂട്ടോറിയല്‍ വിഡിയോയുടെ ആശയം. തിരുവനന്തപുരം സിറ്റിയിലെ വനിതാ സ്വയംപ്രതിരോധ സംഘത്തിലെ അംഗങ്ങളായ ജയമേരി, സുല്‍ഫത്ത്, അനീസ്ബാന്‍, അതുല്യ എന്നിവരാണ് വിഡിയോയിലൂടെ പരിശീലനം നല്‍കുന്നത്.
