കുഴിത്തുറ(കന്യാകുമാരി): മദ്യപിക്കാന്‍ പണം കിട്ടാത്തതിനെത്തുടര്‍ന്ന് യുവാവ് റോഡിലേക്കു തള്ളിയിട്ടയാള്‍ ബസിനടിയില്‍പെട്ടു മരിച്ചു. മടിച്ചല്‍ സ്വദേശി മുത്തയ്യന്‍ (63) ആണ് കഴിഞ്ഞദിവസം രാത്രി ബസിനടിയില്‍പ്പെട്ട് മരിച്ചത്. പോലീസ് പറയുന്നത് വീട്ടിലേക്കാവശ്യമായ സാധനങ്ങള്‍ വാങ്ങിയ ശേഷം ബസിനായി കുഴിത്തുറയില്‍ കാത്ത് നില്‍ക്കുകയായിരുന്നു മുത്തയ്യന്‍.
ഇതിനിടെ കോണം മരുതങ്കോട് സ്വദേശി ശ്രീജിത്ത് (27) മുത്തയ്യനോട് മദ്യപിക്കുന്നതിനായി പണം ചോദിച്ചു. പണമില്ലെന്ന് പറഞ്ഞതിനെത്തുടര്‍ന്നുണ്ടായ തര്‍ക്കത്തിനിടെ ശ്രീജിത്ത് മുത്തയ്യനെ പിടിച്ചു തള്ളുകയായിരുന്നു. നിലത്തുവീണ മുത്തയ്യന്‍ അതുവഴി വന്ന ബസിനടിയില്‍പെട്ടു. ഗുരുതരപരുക്കേറ്റ വയോധികനെ കുഴിത്തുറ സര്‍ക്കാര്‍ ആശുപത്രിയിലെത്തിച്ചെങ്കിലും മരിച്ചു. പ്രതി ശ്രീജിത്തിനെ പോലീസ് അറസ്റ്റ് ചെയ്തു.
