കൊട്ടാരക്കര: വാഹനപരിശോധനയ്ക്കിടെ മദ്യലഹരിയില്‍ പോലീസിനെ ആക്രമിച്ച രണ്ടു സൈനികര്‍ അറസ്റ്റില്‍. ഇടിവള കൊണ്ടുള്ള ആക്രമണത്തില്‍ കണ്‍ട്രോള്‍ റൂം എസ.്‌ഐയുടെ കൈയൊടിഞ്ഞു. അവധിക്കു നാട്ടിലെത്തിയ സൈനികരായ കോട്ടാത്തല രോഹിണി മന്ദിരത്തില്‍ എസ്. ഈശ്വര്‍ചന്ദ്രന്‍ (26), പാവുമ്പ മണപ്പള്ളി നോര്‍ത്ത് അനുഭവനില്‍ എം.അനു (25) എന്നിവരാണ് ആക്രമണക്കേസില്‍ അറസ്റ്റിലായത്.
ഇവരെ കോടതി റിമാന്‍ഡ് ചെയ്തു. ഇവരുടെ സുഹൃത്തും സൈനികനുമായ കോട്ടാത്തല സ്വദേശി നിഥിന് (24) എതിരെ മദ്യപിച്ചു വാഹനം ഓടിച്ചതിനു കേസെടുത്തു.
കഴിഞ്ഞ ദിവസം രാത്രി 11നു ചന്തമുക്കിനു സമീപമാണു സംഭവം. വാഹനപരിശോധന നടത്തുകയായിരുന്ന എസ്.ഐ ആഷിര്‍ കോഹൂറിന്റെ നേതൃത്വത്തിലുള്ള സംഘം ബൈക്കിലെത്തിയ നിഥിനെയാണ് ആദ്യം തടഞ്ഞത്. ഇയാള്‍ക്കു പിന്നാലെ മറ്റൊരു ബൈക്കിലെത്തിയ ഈശ്വര്‍ചന്ദ്രനും മഹേഷും ഇതു ചോദ്യം ചെയ്തു.
മൂവരെയും കസ്റ്റഡിയിലെടുത്തു വൈദ്യപരിശോധനയ്ക്കു കൊണ്ടുപോകാനുള്ള ശ്രമവും ചെറുത്തതോടെ കൂടുതല്‍ പോലീസ് സ്ഥലത്തെത്തി. ജീപ്പിലേക്കു കയറ്റിയപ്പോഴാണ് ഈശ്വര്‍ചന്ദ്രന്‍ ഇടിവള കൊണ്ട് എസ്‌ഐ രാജേന്ദ്രപ്രസാദിനെ ആക്രമിച്ചത്. എസ്.ഐ. ആഷിര്‍ കോഹൂര്‍, സി.പി.ഒ. ശ്രീലാല്‍ എന്നിവര്‍ക്കും പരുക്കേറ്റു.
