തിരുവനന്തപുരം: കഠിനംകുളത്തെ കന്യാസ്ത്രീമഠത്തില്‍ കയറി പ്രായപൂര്‍ത്തിയാകാത്ത പെണ്‍കുട്ടികളെ പീഡിപ്പിച്ച പോക്‌സോ കേസില്‍ നാല് പേര്‍ അറസ്റ്റില്‍. മഠത്തില്‍ താമസിച്ചിരുന്ന പെണ്‍കുട്ടിയുടെ സുഹൃത്തുക്കളായ യുവാക്കളാണ് അറസ്റ്റിലായത് എന്നാണ് പോലീസ് നല്‍കുന്ന വിവരം. പട്രോളിങ് നടത്തുകയായിരുന്ന കഠിനംകുളം പോലീസാണ് യുവാക്കളെ പിടികൂടിയത്.
കഴിഞ്ഞ ദിവസം രാത്രി പെണ്‍കുട്ടികളെ കണ്ടശേഷം കന്യാസ്ത്രീമഠത്തിന്റെ മതില്‍ ചാടി പുറത്തുവന്ന രണ്ട് യുവാക്കള്‍ എത്തിയത് പട്രോളിങ് സംഘത്തിന്റെ മുന്നിലേക്കായിരുന്നു. ഇവരെ പിടികൂടി ചോദ്യം ചെയ്തതോടെയാണ് പീഡന വിവരവും വേറെയും പ്രതികളുള്ളതും അറിയുന്നത്.
മഠത്തില്‍ പഠിക്കുന്ന ഒരു പെണ്‍കുട്ടിയുടെ സുഹൃത്താണ് ആദ്യം ഇവിടെ വന്നിരുന്നത്. പിന്നാലെ ഇയാളുടെ സുഹൃത്തുക്കളായ മറ്റ് യുവാക്കളും മഠത്തില്‍ വന്ന് പെണ്‍കുട്ടികളെ പീഡിപ്പിച്ചു വരികയായിരുന്നു. മദ്യം നല്‍കി പീഡിപ്പിച്ചുവെന്നാണ് പെണ്‍കുട്ടികളുടെ മൊഴി. തുടര്‍ന്ന് സംഭവത്തില്‍ പോക്‌സോ പ്രകാരം കഠിനംകുളം പൊലീസ് കേസെടുത്തു. നാല് കേസുകളാണ് പൊലീസ് രജിസ്റ്റര്‍ ചെയ്തിരിക്കുന്നത്. അറസ്റ്റ് ചെയ്തവരെ ഇന്ന് കോടതിയില്‍ ഹാജരാക്കും.
