കേരള കോൺഗ്രസ് എമ്മിന്റെ എൽഡിഎഫ് പ്രവേശനത്തിന് പിന്നാലെ പാർട്ടിയ്ക്ക് മന്ത്രിസ്ഥാനം നല്കാൻ സിപിഐഎമ്മിൽ ആലോചന .ജോസ് കെ മാണി വിഭാഗത്തിന് മന്ത്രിസ്ഥാനം നൽകുന്നത് മധ്യതിരുവിതാംകൂറിൽ എൽഡിഎഫിന് ഗുണം ചെയ്യുമെന്നാണ് കണക്കുകൂട്ടൽ .
മന്ത്രിസഭയുടെ കാലാവധി ഇനി 8 മാസം കൂടിയാണുള്ളത് .അതുകൊണ്ട് ഇക്കാര്യത്തിൽ ഉടൻ തീരുമാനം ഉണ്ടാകും .ജയരാജോ റോഷി അഗസ്റ്റിനോ മന്ത്രിയാകുമെന്നാണ് സൂചന .അധികാര കേന്ദ്രീകൃത പാർട്ടിയായ കേരള കോൺഗ്രസ് എമ്മിന് അണികളെ പിടിച്ചു നിർത്താൻ സർക്കാരിൽ പങ്കാളിത്തം വേണമെന്ന് ജോസ് കെ മാണിയും കരുതുന്നു .
ജോസഫ് വിഭാഗത്തിലെ കുറച്ച് നേതാക്കളെ മറുകണ്ടം ചാടിക്കാനും ഈ നീക്കം കൊണ്ടാകും എന്നാണ് കണക്കു കൂട്ടൽ .സിപിഎമ്മിന് അപ്രാപ്യമായ പല മണ്ഡലങ്ങളും പിടിക്കാൻ കേരള കോൺഗ്രസ് എമ്മിനെ കൂടെ കൂട്ടിയതിലൂടെ കഴിയും എന്നാണ് സിപിഐഎം കരുതുന്നത് .
എന്നാൽ ജോസ് കെ മാണി വിഭാഗം എൽഡിഎഫിൽ വരുന്നതിൽ പ്രത്യേകിച്ച് ഗുണം ഇല്ല എന്ന നിലപാട് ആണ് സിപിഐ സ്വീകരിച്ചിരിക്കുന്നത് .സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണനുമായുള്ള കൂടിക്കാഴ്ചയിൽ സിപിഐ സംസ്ഥാന സെക്രട്ടറി കാനം രാജേന്ദ്രൻ ഇക്കാര്യം വ്യക്തമാക്കുകയും ചെയ്തു .
സിപിഐഎം മന്ത്രിമാരിൽ ഒരാളെ രാജിവെച്ചിട്ടാണെങ്കിലും ജോസ് കെ മാണി വിഭാഗത്തിനു മന്ത്രിസ്ഥാനം നല്കാൻ ആണ് സിപിഐഎം ആലോചിക്കുന്നത്.എൽഡിഎഫ് ഘടക കക്ഷികളെ ഇക്കാര്യം ബോധ്യപ്പെടുത്താനുള്ള കടമ്പ മാത്രമാണുള്ളത് .
