പത്തനംതിട്ട : മദ്യപിച്ച്‌ സ്വകാര്യ ബസ് ഓടിച്ച ഡ്രൈവറെ അറസ്റ്റ് ചെയ്തു.അടൂര്‍ ട്രാഫിക് പൊലീസാണ് ഇയാളെ അറസ്റ്റ് ചെയ്തത്.കുടശനാട് കണ്ണങ്കരമുകള്‍ പടിഞ്ഞാറേ പാളവിളവീട്ടില്‍ രമേശാണ് (28 ) അറസ്റ്റിലായത്.
കഴിഞ്ഞദിവസം രാവിലെ 9.15-ന് അടൂര്‍ കെഎസ്‌ആര്‍ടിസി ജഗ്ഷനിലാണ് സംഭവം. അടൂര്‍ പത്തനാപുരം റൂട്ടില്‍ സര്‍വീസ് നടത്തുന ‘ഐശ്വര്യ’ ബസിലെ ഡ്രൈവറാണ് ഇയാള്‍. ബസ് ഓടുന്ന സമയത്തെച്ചൊല്ലി രണ്ട് സ്വകാര്യ ബസ് ജീവനക്കാര്‍ തര്‍ക്കത്തില്‍ ഏര്‍പ്പെട്ടപ്പോള്‍, കെഎസ്‌ആര്‍ടിസി ജംഗ്ഷനില്‍ ട്രാഫിക് ഡ്യൂട്ടിയിലുണ്ടായിരുന്ന ഹോം ഗാര്‍ഡ് വിവരം ട്രാഫിക് ടീമിനെ അറിയിച്ചു.
തുടര്‍ന്ന്, ഗ്രേഡ് എസ്‌ഐ അശോക് കുമാറിന്‍റെ നേതൃത്വത്തില്‍ നടത്തിയ അന്വേഷണത്തിലാണ് ‘ഐശ്വര്യ’ ബസിലെ ഡ്രൈവര്‍ മദ്യപിച്ചതായി കണ്ടെത്തിയത്. പ്രതിയെ കോടതിയില്‍ ഹാജരാക്കും.
