റിയാദ്: സൗദിയില്‍ ഹൗസ് ഡ്രൈവര്‍മാര്‍ ഉള്‍പ്പെടെയുള്ള ഗാര്‍ഹിക തൊഴിലാളികള്‍ക്ക് ലെവി ചുമത്താന്‍ തീരുമാനം.നാലില്‍ കൂടുതല്‍ ഗാര്‍ഹിക തൊഴിലാളികളുള്ള സൗദി പൗരനും രണ്ടില്‍ കൂടുതല്‍ ഗാര്‍ഹിക തൊഴിലാളികളുള്ള വിദേശി താമസക്കാരനും, ഒരോ വ്യക്തിക്കും വര്‍ഷത്തില്‍ 9,600 റിയാല്‍ തോതില്‍ ലെവി ചുമത്തണമെന്നാണ് തീരുമാനം.മാനവ വിഭവശേഷി മന്ത്രാലമാണ് ഇത് വ്യക്തമാക്കിയത്.
തീരുമാനം രണ്ട് ഘട്ടങ്ങളിലായാണ് നടപ്പിലാക്കുക.ആദ്യ ഘട്ടം 2022 മെയ് 22 മുതലും രണ്ടാം ഘട്ടം 2023 മെയ് 13 മുതലുമായിരിക്കും ആരംഭിക്കുക. ആദ്യഘട്ടത്തില്‍ നാലില്‍ കൂടുതല്‍ ഗാര്‍ഹിക തൊഴിലാളികളുള്ള സൗദി പൗരനും രണ്ടില്‍ കൂടുതല്‍ ഗാര്‍ഹിക തൊഴിലാളികളുള്ള താമസക്കാര്‍ക്കും വേണ്ടി പുതിയ വിസയില്‍ രാജ്യത്തെത്തുന്ന ഗാര്‍ഹിക തൊഴിലാളികള്‍ക്ക് മാത്രമായിരിക്കും ലെവി നടപ്പാക്കുക.രണ്ടാം ഘട്ടത്തില്‍ നിലവിലുള്ളതും പുതുതായി വരുന്നതുമായ ഗാര്‍ഹിക തൊഴിലാളികള്‍ക്ക് ലെവി അടക്കേണ്ടിവരുമെന്നും മാനവ വിഭവശേഷി മന്ത്രാലയം വ്യക്തമാക്കി.
