സത്യന് അന്തിക്കാട്-മോഹന്ലാല് കൂട്ടുകെട്ടിന്റെ ഹൃദയപൂര്വം ഒടിടിയിലേക്ക്; സെപ്റ്റംബര് 26മുതല് സ്ട്രീമിംഗ്; ധ്യാന് മുതല് അനുപമവരെ ഇപ്പോള് കാണാം ഈ ചിത്രങ്ങള്
കൊച്ചി: സത്യന് അന്തിക്കാടും മോഹന്ലാലും വര്ഷങ്ങള്ക്ക് ശേഷം വീണ്ടും ഒന്നിച്ച, ഓണം ബ്ലോക്ക് ബസ്റ്റര് ചിത്രം ‘ഹൃദയപൂര്വം’ ഒടിടിയിലേക്ക്. ഓഗസ്റ്റ് 28ന് ആണ് ചിത്രം തിയറ്ററുകളില് എത്തിയത്. ബോക്സ് ഓഫീസില് വന് തരംഗം സൃഷ്ടിച്ച സത്യന് അന്തിക്കാട്-മോഹന്ലാല് കോമ്പോ സിനിമ സെപ്റ്റംബര് 26 ന് ജിയോ ഹോട്ട്സ്റ്റാറില് സ്ട്രീമിങ് ആരംഭിക്കും. ചിത്രം തിയറ്ററുകളില് നിറഞ്ഞസദസില് പ്രദര്ശനം തുടരുന്നതിനിടെയാണ് ഒടിടി സ്ട്രീമിങ് പ്രഖ്യാപനം
സത്യന് അന്തിക്കാടിന്റെ പതിവുചിത്രങ്ങള് പോലെ കുടുംബപ്രേക്ഷകര് ആഘോഷമാക്കിയ ചിത്രമാണ് ‘ഹൃദയപൂര്വം’. സിദ്ദിഖ്, ജനാര്ദ്ദനന്, സംഗീത് പ്രതാപ്, സംഗീത മാധവന് നായര്, മാളവിക മോഹനന്, ബാബുരാജ്, സബിത ആനന്ദ്, ലാലു അലക്സ്, നിഷാന്, സൗമ്യ ഭാഗ്യന് പിള്ള തുടങ്ങിയവരും പ്രധാന കഥാപാത്രങ്ങളാകുന്നു. ചിത്രത്തിന്റെ കഥ അഖില് സത്യനാണ്. അനൂപ് സത്യനാണ് ചിത്രത്തിന്റെ ചീഫ് അസോസിയേറ്റ് ഡയറക്ടര്. നിര്മാണം ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂര്.
നാല് സിനിമകളാണ് ഈയാഴ്ച സ്ട്രീം ചെയ്യുന്നത്. ധ്യാന് ശ്രീനിവാസന് നായകനായ ഐഡി, അനുപമ പരമേശ്വരന് കേന്ദ്രകഥാപാത്രമാകുന്ന പര്ദ, തുടങ്ങിയ ചിത്രങ്ങൾ ഇതിൽ ഉൾപ്പെടുന്നു
ഐഡി സൈന പ്ലേയിൽ
ധ്യാന് ശ്രീനിവാസന് നായകനായ ഐഡി-ദി ഫേക്കിന്റെ സംവിധാനം നവാഗതനായ അരുണ് ശിവവിലാസമാണ്. തിരക്കഥയും അരുണ് തന്നെയാണ് ഒരുക്കിയത്. ഈ വര്ഷം ആദ്യം തിയേറ്ററുകളിലെത്തിയ ചിത്രത്തിന് സമ്മിശ്ര പ്രതികരണമാണ് ലഭിച്ചത്.
ഇന്ദ്രന്സ്, ദിവ്യ പിള്ള, ലിജോ ജോസ് പെല്ലിശേരി, ജോണി ആന്റണി, കലാഭവന് ഷാജോണ്, അലക്സാണ്ടര് പ്രശാന്ത്, ജയകൃഷ്ണന് തുടങ്ങിയവരാണ് മറ്റു കഥാപാത്രങ്ങളാകുന്നത്. മുഹമ്മദുകുട്ടിയാണ് ചിത്രത്തിന്റെ നിര്മാണം. സംഗീതം- നിഹാല് സാദിഖ്, ക്യാമറ- ഫൈസല് അലി, എഡിറ്റര്- റിയാസ് കെ ബദര്, കല- വേലു വാഴയൂര്. സൈന പ്ലേയിലൂടെ സെപ്റ്റംബര് 19ന് സ്ട്രീമിങ് ആരംഭിക്കും.
ടൂ മെന് മനോരമ മാക്സിൽ
പ്രമുഖ സംവിധായകന് എം.എ. നിഷാദ്, ഇര്ഷാദ് അലി എന്നിവര് കേന്ദ്രകഥാപാത്രങ്ങളാകുന്ന ടൂ മെന് ഒടിടിയിലേക്ക്. മനോരമ മാക്സിൽ സെപ്റ്റംബര് 19 ന് സ്ട്രീമിങ് ആരംഭിക്കും. കെ. സതീഷ് ആണ് ചിത്രത്തിന്റെ സംവിധായകന്, ദുബായിലാണ് ചിത്രത്തിന്റെ പ്രധാന രംഗങ്ങള് ചിത്രീകരിച്ചത്. 2022-ല് ആണ് ചിത്രം റിലീസിനെത്തിയത്. രണ്ജി പണിക്കര്, ബിനു പപ്പു, മിഥുന് രമേശ്, ഹരീഷ് കണാരന്, സോഹന് സീനുലാല്, ഡോണി ഡാര്വിന്, സുനില് സുഗത, ലെന, അനുമോള്, ആര്യ തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.
രണ്ടാം യാമം മനോരമ മാക്സിൽ
സ്വാസികയെ നായികയാക്കി നേമം പുഷ്പരാജ് സംവിധാനം ചെയ്ത രണ്ടാം യാമം മനോരമ മാക്സിലൂടെ സെപ്റ്റംബര് 19 മുതല് സ്ട്രീമിങ് ആരംഭിക്കും. ബനാറസ് എന്ന ചിത്രത്തിനു ശേഷം നേമം പുഷ്പരാജ് സംവിധാനം ചെയ്ത ചിത്രമാണിത്. ധ്രുവന്, ഗൗതം കൃഷ്ണ എന്നിവരും പ്രധാന വേഷങ്ങള് അവതരിപ്പിക്കുന്നു. ജോയി മാത്യു, രേഖ, സുധീര് കരമന, നന്ദു, രമ്യ സുരേഷ്, അംബിക മോഹന് തുടങ്ങിയവരും ചിത്രത്തിലുണ്ട്.
പര്ദ പ്രൈം വീഡിയോയിൽ
സിനിമാ ബണ്ടി, ശുഭം എന്നീ ചിത്രങ്ങളിലൂടെ പ്രേക്ഷകശ്രദ്ധ നേടിയ പ്രവീണ് കണ്ട്രെഗുല സംവിധാനം ചെയ്ത പര്ദ ആമസോണ് പ്രൈം വീഡിയോയില് സ്ട്രീമിങ് ആരംഭിച്ചു. യുവനിരയിലെ ശ്രദ്ധേയയായ അനുപമ പരമേശ്വരന്, ദര്ശന രാജേന്ദ്രന്, സംഗീത കൃഷ് എന്നിവരാണ് പ്രധാന കഥാപാത്രങ്ങളിലെത്തുന്നത്.
