പേവിഷബാധയേറ്റ കുട്ടികള്ക്ക് ജീവിതം തിരിച്ച് നല്കാന് മൃഗസ്നേഹികള്ക്ക് സാധിക്കുമോ? എട്ടാഴ്ചയ്ക്കകം പരിപാലന കേന്ദ്രങ്ങള് തുടങ്ങണം: തെരുവുനായ വിഷയത്തില് സുപ്രീം കോടതിയുടെ നിര്ണായക ഇടപെടല്
ന്യൂഡല്ഹി: തലസ്ഥാനത്തെ മുഴുവന് തെരുവുനായകളെയും പിടികൂടി നഗരത്തിന് പുറത്ത് എവിടെയെങ്കിലും കൂട്ടിലാക്കണമെന്ന് സുപ്രീം കോടതി
നിര്ദേശം. പേവിഷബാധ മരണങ്ങള് ചൂണ്ടിക്കാട്ടിയാണ് കോടതിയുടെ നിര്ണായക ഇടപെടല്. ഇതിനായി എത്രയും വേഗം നടപടികള് ആരംഭിക്കണമെന്ന് ഡല്ഹിയിലെയും സമീപ മേഖലകളായ നോയിഡ, ഗാസിയാബാദ് (യുപി), ഗുരുഗ്രാം (ഹരിയാന) എന്നിവിടങ്ങളിലെയും ബന്ധപ്പെട്ട അധികൃതരോട് കോടതി ആവശ്യപ്പെട്ടു.
തെരുവുനായകളെ പാര്പ്പിക്കാന് എട്ടാഴ്ചയ്ക്കകം പരിപാലന കേന്ദ്രങ്ങള് തുടങ്ങണം. മൃഗസ്നേഹികളെ രൂക്ഷമായി വിമര്ശിച്ച സുപ്രീംകോടതി തെരുവുനായകളെ നീക്കുന്നതിന് ആരെങ്കിലും തടസം നിന്നാല് കര്ശന നടപടിയെടുക്കുമെന്നും മുന്നറിയിപ്പ് നല്കി. ഡല്ഹിയില് ജനനനിയന്ത്രണ കേന്ദ്രങ്ങള് ഉള്ളതാണെന്നും അവ പ്രവര്ത്തനസജ്ജമാക്കിയാല് മതിയെന്നും മൃഗസ്നേഹികള്ക്ക് വേണ്ടി ഹാജരായ അഭിഭാഷകന് വാദിച്ചെങ്കിലും ബെഞ്ച് അംഗീകരിച്ചില്ല. പേവിഷബാധയേറ്റ കുട്ടികള്ക്ക് ജീവിതം തിരിച്ചുനല്കാന് ഈ മൃഗസ്നേഹികള്ക്കും സന്നദ്ധപ്രവര്ത്തകര്ക്കും സാധിക്കുമോ? കുറച്ചുപേര് തങ്ങള് മൃഗസ്നേഹികളാണെന്നോ മറ്റോ കരുതുന്നതിന്റെ പേരില് മാത്രം കുഞ്ഞുങ്ങളെ ബലികൊടുക്കാനാവില്ല. ഇനിയെങ്കിലും നടപടികളെടുക്കണമെന്നും ബെഞ്ച് പറഞ്ഞു.
ഡല്ഹിയില് തെരുവുനായയുടെ കടിയേറ്റ് പേവിഷബാധയുണ്ടാകുന്നത് സംബന്ധിച്ച പത്രവാര്ത്ത അടിസ്ഥാനമാക്കി ജൂലൈ 28-ന് സ്വമേധയാ എടുത്ത കേസിലാണ് ജസ്റ്റിസുമാരായ ജെ.ബി. പര്ദിവാല, ആര്. മഹാദേവന് എന്നിവരുടെ ബെഞ്ചിന്റെ സുപ്രധാന ഉത്തരവ്.
ഡല്ഹിയിലെ വിഷയമാണെങ്കിലും തെരുവുനായശല്യത്തിലെ സുപ്രീംകോടതി ഇടപെടല് മറ്റിടങ്ങളിലും പ്രശ്നപരിഹാരത്തിന് വഴിയൊരുക്കും.
