ഗുവാഹത്തി: ലോകമെങ്ങും ക്രിസ്മസ് ആഘോഷത്തിന്‍റെ വേളയിലാണ്. ആ സന്തോഷത്തിന്‍റെ വിവിധ തരത്തിലുള്ള വീഡിയോകളും സോഷ്യല്‍ മീഡിയയില്‍ വൈറലാണ്.
ഇതിനിടയിലാണ് അസമിലെ ആശുപത്രിയില്‍ നിന്നുള്ള വ്യത്യസ്തമായ ക്രിസ്മസ് ആഘോഷത്തിന്‍റെ വീഡിയോ വൈറലായിരിക്കുന്നത്. ലോകം മുഴുവൻ ക്രിസ്മസ് ആഘോഷിക്കുന്ന വേളയില്‍ ആശുപത്രി കിടക്കയില്‍ രോഗത്തോട് മല്ലടിക്കുന്ന മനുഷ്യരെ ചേര്‍ത്ത് പിടിക്കുന്ന സ്നേഹത്തിന്‍റെ സന്ദേശമായാണ് വീഡിയോ പ്രചരിക്കുന്നത്.
കഴിഞ്ഞ ദിവസം അസമിലെ ആശുപത്രിയിലെ ഡോക്ടര്‍മാരും നഴ്സുമാരും ജീവനക്കാരുമെല്ലാം ചേര്‍ന്ന് ചികിത്സയിലുള്ള രോഗികള്‍ക്കായും കൂട്ടിരിപ്പുകാര്‍ക്ക് വേണ്ടിയും സ്നേഹത്തിന്‍റെ മനോഹരമായൊരു വിരുന്ന് ഒരുക്കിയിരിക്കുന്നത്.
കരോളിനൊപ്പം ഭക്ഷണവും മറ്റ് സമ്മാനങ്ങളും ആശുപത്രി ജീവനക്കാർ ചേർന്ന് രോഗികൾക്കും കൂട്ടിരിപ്പുകാർക്കും സമ്മാനിച്ചു.അസമിന്‍റെ തലസ്ഥാനമായ ഗുവാഹത്തിയിലെ അപ്പോളോ ആശുപത്രിയിലാണ് രോഗികള്‍ക്കായി മനോഹരമായ ക്രിസ്മസ് കരോള്‍ ഒരുക്കിയത്.
