കോട്ടയം: സിബിഎസ്ഇ കോട്ടയം സഹോദയ സ്കൂൾ കലോത്സവം ഭവ്യം – 2023 ഒക്ടോബർ 26 മുതൽ 28 വരെ പള്ളിക്കത്തോട് അരവിന്ദ വിദ്യാമന്ദിരത്തിൽ നടത്തും. കോട്ടയം, ഇടുക്കി, പത്തനംതിട്ട ജില്ലകളിലെ 110 സ്കൂളുകളിൽ നിന്നായി 5300 കലാപ്രതിഭകൾ മൽസരങ്ങളിൽ പങ്കെടുക്കും.
140 ഇനങ്ങളിലാണ് മൽസരങ്ങൾ അരങ്ങേറുക. പങ്കെടുക്കും. 20 വേദികളിലായി നടക്കുന്ന മത്സരങ്ങൾക്ക് ഒരുക്കങ്ങൾ പൂർത്തിയായതായി സഹോദയ പ്രസിഡന്റ് ബെന്നി ജോർജ്, ജനറൽ സെക്രട്ടറി കവിത ആർ.സി, ട്രഷറർ ഫ്രാങ്ക്ളിൻ മാത്യു, സി സുരേഷ് എന്നിവർ അറിയിച്ചു.
26 ന് രാവിലെ 10ന് അരവിന്ദയിലെ പ്രധാന വേദിയിൽ പ്രമുഖ സിനിമ ടി വി താരം ജയരാജ് വാര്യർ ഭവ്യം – 2023 ഉദ്ഘാടനം ചെയ്യും.
സിറ്റിസൺ ഇന്ത്യ ഫൗണ്ടേഷൻ മാനേജിംഗ് ട്രസ്റ്റിയും മുൻ പ്രധാന മന്ത്രിയുടെ പ്രിൻസിപ്പൽ സെക്രട്ടറിയുമായിരുന്ന ടി.കെ.എ. നായർ മുഖ്യാതിഥിയാകും. സ്റ്റാർ സിംഗർ മൽസരാർഥി ഗോകുൽ ഗോപകുമാർ പ്രത്യേക അതിഥിയാകും. സമാപന സമ്മേളനം 28 ന് വൈകിട്ട് 3.30 ന് നടത്തും. ഗവ. ചീഫ് വിപ്പ് ഡോ എൻ. ജയരാജ് സമ്മാനദാനം നിർവഹിക്കും. പ്രശസ്ത സംവിധായകൻ ശ്രീ. ജയരാജ് മുഖ്യാതിഥിയാകും.
വിവിധ ജില്ലകളിൽ നിന്ന് മൽസരങ്ങളിൽ പങ്കെടുക്കാൻ എത്തുന്നവർക്ക് വിപുലമായ ക്രമീകരണങ്ങൾ ഏർപ്പെടുത്തിയിട്ടുണ്ട്.പ്രധാന വേദി ഉൾപ്പെടെ 17 വേദികൾ അരവിന്ദ വിദ്യാമന്ദിരത്തിൽ ക്രമീകരിച്ചിട്ടുണ്ട്. പളളിക്കത്തോട് പഞ്ചായത്ത് കമ്യൂണിറ്റി ഹാൾ, ബ്ലോക്ക് പഞ്ചായത്ത് ഹാൾ, ആനിക്കാട് ഭഗവതി ദേവസ്വം ഹാൾ, എന്നിവടങ്ങളിൽ ഓരോ വേദികളും മൽസരത്തിനായി ക്രമീകരിച്ചിട്ടുണ്ട്. കലോൽസവത്തിന് നടത്തിപ്പിനായി 250 അംഗ സ്വാഗത സംഘം പ്രവർത്തിച്ചു വരുന്നു.
