ആലപ്പുഴ: ശക്തമായ കാറ്റിലും മഴയിലും മരം കടപുഴകി വീണ് ക്ഷേത്രം തകര്‍ന്നു. അമ്ബലപ്പുഴ നീര്‍ക്കുന്നം അപ്പക്കല്‍ ശ്രീ ദുര്‍ഗാദേവി നാഗരാജ ക്ഷേത്രത്തിലാണ് അപകടമുണ്ടായത്.
പുലര്‍ച്ചെ നാലരയോടെയായിരുന്നു സംഭവം. ശ്രീ കോവിലിന് സമീപം നിന്ന കൂറ്റൻ പാലമരം കാറ്റില്‍ കടപുഴകി സപ്താഹപ്പന്തലിലേക്ക് വീഴുകയായിരുന്നു. ഈ സമയം ജീവനക്കാരും ഭക്തരുമില്ലാതിരുന്നതിനാല്‍ വൻ ദുരന്തം ഒഴിവായി.
അപകടത്തില്‍ സപ്താഹപ്പന്തലിൻ്റെ കോണ്‍ക്രീറ്റ് തൂണുകളും ഷീറ്റ് കൊണ്ട് നിര്‍മിച്ച മേല്‍ക്കൂരയും പൂര്‍ണമായി തകര്‍ന്നു. ഇതിലുണ്ടായിരുന്ന ക്ഷേത്രോപകരണങ്ങളും കസേരകള്‍ ഉള്‍പ്പെടെയുള്ള ഫര്‍ണീച്ചറും തകര്‍ന്നു. ഇൻ്റര്‍ലോക്ക് കൊണ്ട് നിര്‍മിച്ച തറയും തകര്‍ന്നു. ഏകദേശം അഞ്ച് ലക്ഷം രൂപയുടെ നഷ്ടം കണക്കാക്കുന്നതായി ക്ഷേത്ര ഭാരവാഹികള്‍ അറിയിച്ചു.
