കണ്ണൂര്‍: മൂന്നുവര്‍ഷം മുമ്പ് തെരുവുനായകളുടെ അക്രമണത്തിന് ഇരയായ ആശാവര്‍ക്കര്‍ക്കു നേരെ വീണ്ടും ആക്രമണം. പിലാത്തറയില്‍ ആശവര്‍ക്കറായി പ്രവര്‍ത്തിക്കുന്ന ചെറുതാഴം പഞ്ചായത്ത് അഞ്ചാം വാര്‍ഡ് ആശവര്‍ക്കര്‍ കെപി രാധാമണിക്ക് നേരെയാണ് തെരുവ് നായ്ക്കളുടെ അക്രമം ഉണ്ടായത്.
ഉച്ചയ്ക്ക് 2.30 ഓടെ പിലാത്തറ ടൗണിലെ വീട്ടില്‍ ക്ലോറിനേഷന്‍ ചെയ്യുവാന്‍ പോയ സമയത്താണ് വീടിന് സമീപമുണ്ടായിരുന്ന തെരുവ് നായ്ക്കള്‍ കൂട്ടത്തോടെ വന്ന് അക്രമിക്കാന്‍ ശ്രമിച്ചത്. നായ്ക്കള്‍ കൂട്ടത്തോടെ വന്ന് രാധാമണിയെ കടിക്കാന്‍ ശ്രമിച്ചു. സാരിക്ക് കടിയേറ്റതിനെ തുടര്‍ന്ന് ബഹളം വെക്കുകയും കയ്യിലുണ്ടായിരുന്ന ബാഗുകൊണ്ട് നായ്ക്കളെ പ്രതിരോധിക്കുകയും ചെയ്തു.
തലനാരിഴയ്ക്കാണ് കുടുതല്‍ കടിയേല്‍ക്കാതെ രക്ഷപെട്ടത്. മൂന്നുവര്‍ഷംമുമ്പ് രാധാമണിയെ പിലാത്തറ ഭാഗത്തുനിന്നും തെരുവ് നായ കടിച്ചിരുന്നു. പിലാത്തറ ടൗണിലും പരിസരങ്ങളിലും തെരുവ് നായിക്കള്‍ വര്‍ധിച്ചിരിക്കുകയാണ്. കഴിഞ്ഞ ഏതാനും ദിവസങ്ങള്‍ക്കുമുമ്പും തെരുവുനായ അക്രമം പിലാത്തറയില്‍ ഉണ്ടായിരുന്നു. തെരുവുനായ പ്രശ്നത്തിന് പരിഹാരം കണ്ടെത്താന്‍ ബന്ധപ്പെട്ട അധികൃതര്‍ ഇടപെടണമെന്ന് ജനങ്ങള്‍ ആവശ്യപ്പെട്ടു.
