പറവൂർ:പട്ടാപ്പകല്‍ ആള്‍താമസമില്ലാത്ത വീടിന്റെ ഗേറ്റ് പൊളിച്ചെടുത്ത് ഉന്തുവണ്ടിയില്‍ കൊണ്ടുപോയി ആക്രിക്കടയില്‍ വിറ്റ അന്തര്‍ സംസ്ഥാന തൊഴിലാളി പിടിയില്‍.
അസം ഗിലാനി സ്വദേശി ബാബുല്‍ ഇസ്ലാമാ(25) പിടിയിലായത്. ഇക്കഴിഞ്ഞ 13 ന് ആണ് കേസിനാസ്പദമയ സംഭവം.
തോന്ന്യകാവ് പൂക്കോട്ട് റോഡില്‍ അരവിന്ദാക്ഷ പ്രഭുവിന്റെ വീടിന്റെ ഗേറ്റാണ് ഇയാള്‍ പട്ടാപ്പകല്‍ പൊളിച്ചെടുത്ത് ചെറിയ ഉന്തുവണ്ടിയില്‍ കയറ്റിക്കൊണ്ടുപോയത്. സംഭവത്തിന്റെ ദൃശ്യങ്ങള്‍ സമീപത്തെ സിസിടിവിയില്‍ പതിഞ്ഞിരുന്നു.
ഞായറാഴ്ച രാവിലെ സമാനരീതിയില്‍ മറ്റൊരു ആള്‍താമസമില്ലാത്ത വീടിന്റെ ഗേറ്റ് പൊളിച്ചെടുക്കാന്‍ ശ്രമിക്കുന്നതിനിടെ പ്രദേശവാസികള്‍ ചേര്‍ന്ന് ഇയാളെ കയ്യോടെ പിടികൂടി പൊലീസില്‍ ഏല്‍പിക്കുകയായിരുന്നു.പഴയ സംഭവത്തിന്റെ സിസിടിവി ദൃശ്യങ്ങൾ പരിശോധിച്ച് ഉറപ്പുവരുത്തി പോലീസ് ഇയാളെ അറസ്റ്റ് ചെയ്യുകയായിരുന്നു.
പൊളിച്ചെടുത്ത ഗേറ്റ് വഴിക്കുളങ്ങരയിലെ ഒരു ആക്രിക്കടയില്‍ വിറ്റതായി ചോദ്യം ചെയ്യലില്‍ ഇയാള്‍ മൊഴി നല്‍കിയതായി പൊലീസ് അറിയിച്ചു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
