ബിഗ് ബജറ്റ് ചിത്രങ്ങളുടെ സീക്വലുകൾ തെന്നിന്ത്യൻ സിനിമയിൽ ഇന്ന് പുതുമയല്ല. ബാഹുബലിയിൽ നിന്ന് ആരംക്ഭിച്ച വിജയകഥകൾ ഇപ്പോൾ പൊന്നിയിൽ സെൽവൻ 2 ൽ എത്തിനിൽക്കുന്നു. ഏപ്രിൽ 28 ന് ലോകമെമ്പാടും തിയറ്ററുകളിലെത്തിയ ചിത്രം 10 ദിവസം പൂർത്തിയാക്കി കഴിഞ്ഞു. വലിയ ബോക്സ് ഓഫീസ് വിജയം നേടിയ ചിത്രത്തിൻറെ രണ്ടാം ഭാഗം ആയതിനാൽത്തന്നെ വൻ പ്രീ റിലീസ് ഹൈപ്പ് ഉയർത്തിയ ചിത്രമായിരുന്നു പി എസ് 2. മികച്ച ഇനിഷ്യൽ നേടിയിരുന്ന ചിത്രത്തിൻറെ 10 ദിവസത്തെ ബോക്സ് ഓഫീസ് കളക്ഷൻ റിപ്പോർട്ടുകൾ പുറത്തെത്തിയിട്ടുണ്ട്.
തമിഴ്‍നാട്ടിൽ നിന്ന് മാത്രം ചിത്രം 100 കോടി ക്ലബ്ബിൽ ഇടംപിടിച്ചുകഴിഞ്ഞു പി എസ് 2. എന്നാൽ വിദേശ മാർക്കറ്റുകളിൽ നിന്ന് അതിലുമധികം നേടിയിട്ടുണ്ട് ചിത്രം. പ്രമുഖ ട്രാക്കർമാരായ ലെറ്റ്സ് സിനിമയുടെ കണക്ക് പ്രകാരം 118.60 കോടിയാണ് വിദേശ മാർക്കറ്റുകളിൽ നിന്നുള്ള ചിത്രത്തിന്റെ ആകെ നേട്ടം. ആഗോള ബോക്സ് ഓഫീസിൽ നിന്ന് ആദ്യ 10 ദിനങ്ങളിൽ ചിത്രം ആകെ നേടിയ ഗ്രോസ് 270 കോടി ആണെന്നും ലെറ്റ്സ് സിനിമ റിപ്പോർട്ട് ചെയ്യുന്നു.
വിക്രം, കാർത്തി, ജയം രവി, ഐശ്വര്യ റായ് ബച്ചൻ, തൃഷ കൃഷ്‍ണൻ, റഹ്മാൻ, പ്രഭു, ജയറാം, ശരത് കുമാർ, വിക്രം പ്രഭു, ബാബു ആനറണി, റിയാസ് ഖാൻ, ലാൽ, അശ്വിൻ കാകുമാനു, റിയാസ് ഖാൻ, ശോഭിത ധൂലിപാല, ഐശ്വര്യ ലക്ഷ്‍മി, ജയചിത്ര തുടങ്ങി ഇന്ത്യൻ സിനിമയിലെ തന്നെ നിരവധി പ്രമുഖ താരങ്ങൾ ഒരുമിച്ച് അണിനിരക്കുകയാണ് പൊന്നിയിൻ സെൽവനിലൂടെ മണിരത്നത്തിൻറെ ഫ്രെയ്‍മിൽ. അതേസമയം ഇന്ത്യൻ സിനിമയിൽ തന്നെ കഴിഞ്ഞ വർഷത്തെ വലിയ വിജയങ്ങളിൽ ഒന്നായിരുന്നു പൊന്നിയിൻ സെൽവൻ 1. 492 കോടി ആയിരുന്നു ചിത്രത്തിൻറെ ലൈഫ് ടൈം ഗ്രോസ്. രണ്ടാം ഭാഗം ഇത് തകർക്കുമോ എന്ന് കണ്ടറിയേണ്ടിയിരിക്കുന്നു.
