ഏഴ് വർഷത്തിനു ശേഷം അൽഫോൺസ് പുത്രന്റെ സംവിധാനത്തിൽ ഒരു സിനിമ ഇന്ന് എത്തുകയാണ്. ‘പ്രേമം’ എന്ന വൻ ഹിറ്റിനു ശേഷം ‘ഗോൾഡു’മായി അൽഫോൺസ് പുത്രൻ എത്തുമ്പോൾ പൃഥ്വിരാജാണ് നായകൻ എന്നതിനാൽ പ്രതീക്ഷകൾ വർദ്ധിക്കുക സ്വാഭാവികം. പല തവണ റിലീസ് മാറ്റിവെച്ച ചിത്രം പ്രതിബന്ധങ്ങളെല്ലാം മറികടന്നാണ് ഇന്ന് എത്തുന്നത്. ‘നേര’വും ‘പ്രേമ’വും പോലെ ‘ഗോൾഡും’ അപൂർണമായതാണ് എന്നാണ് അൽഫോൺസ് പുത്രൻ പറയുന്നത്.
‘നേര’വും ‘പ്രേമ’വും പോലെ ‘ഗോൾഡും’ ഇംപെർഫെക്റ്റ് ആണ്. അതുകൊണ്ട് മിക്കവാറും നിങ്ങൾക്ക് ഗോൾഡ് ഇഷ്‍ടപ്പെടാൻ സാധ്യത ഉണ്ട്. ‘ഗോൾഡ്’ റിലീസാണ്. കണ്ടതിനുശേഷം ഫ്രീ ആണങ്കിൽ ഇഷ്‍ടപ്പെട്ടാലും ഇഷ്‍ടപ്പെട്ടില്ലെങ്കിലും എന്നോട് നിങ്ങളുടെ ഫീഡ്‍ബാക്ക് തുറന്നുപറയണം. ആദ്യ രംഗത്തിൽ തന്നെ കഥ തുടങ്ങും. ബാക്കി ഞാൻ പറഞ്ഞ് കുളമാക്കുന്നില്ല, ബാക്കി നിങ്ങൾ കണ്ടിട്ട് പറ എന്നുമാണ് അൽഫോൺസ് പുത്രൻ ഫേസ്‍ബുക്കിൽ കുറിച്ചിരിക്കുന്നത്.
പൃഥ്വിരാജിനും നയൻതാരയ്‍ക്കും പുറമ അജ്‍മൽ അമീർ, കൃഷ്‍ണ ശങ്കർ, ശബരീഷ് വർമ, വിനയ് ഫോർട്ട്, റോഷൻ മാത്യു, മല്ലിക സുകുമാരൻ, ലാലു അലക്സ്, ജഗദീഷ്, സൈജു കുറുപ്പ്, സുരേഷ് കൃഷ്‍ണ, ശാന്തി കൃഷ്‍ണ, പ്രേം കുമാർ തുടങ്ങിയവരും ചിത്രത്തിൽ അഭിനയിക്കുന്നു. ലിസ്റ്റിൻ സ്റ്റീഫനുമൊപ്പം പൃഥ്വിരാജും ചേർന്നാണ് നിർമ്മാണം. പൃഥ്വിരാജ് പ്രൊഡക്ഷൻസ്, മാജിക് ഫ്രെയിംസ് എന്നീ ബാനറുകളിലാണ് നിർമാണം. മാജിക് ഫ്രെയിംസ് ആണ് വിതരണം. അൽഫോൺസ് പുത്രൻ തന്നെയാണ് ചിത്രത്തിന്റെ തിരക്കഥയും എഴുതുന്നത്.
രാജേഷ് മുരുഗേശനാണ് ചിത്രത്തിന്റെ സംഗീത സംവിധാനം നിർവഹിക്കുന്നത്. ശബരീഷ് വർമയാണ് ചിത്രത്തിന്റെ ഗാനരചയിതാവ്. ‘പാട്ട്’ എന്നൊരു ചിത്രവും അൽഫോൺസ് പുത്രന്റെ സംവിധാനത്തിൽ പ്രഖ്യാപിച്ചിട്ടുണ്ട്. ഫഹദ് കേന്ദ്ര കഥാപാത്രമായി എത്തുന്ന ചിത്രത്തിൽ നായൻതാര നായികയാകും എന്നുമായിരുന്നു പ്രഖ്യാപനം. കഴിഞ്ഞ സെപ്റ്റംബറിൽ ആയിരുന്നു ചിത്രത്തിന്റെ പ്രഖ്യാപനം നടന്നത്. എന്നാൽ പിന്നീട് സിനിമയെ കുറിച്ചുള്ള വിവരങ്ങൾ പുറത്തുവന്നിരുന്നില്ല.
