മുംബൈ: ഭാര്യയെ കാറിടിപ്പിച്ചു വീഴ്ത്തിയ ബോളിവുഡ് നിര്‍മാതാവ് കമാല്‍ കിഷോര്‍ മിശ്രയ്‌ക്കെതിരെ കേസ്. ഒരു സ്ത്രീക്കൊപ്പം കമാല്‍ കാറിലിരിക്കുന്നതു കണ്ട ഭാര്യ അതു ചോദ്യം ചെയ്തപ്പോള്‍ അവരെ ഇടിച്ചുവീഴ്ത്തി കാലിലൂടെ കാര്‍ കയറ്റുകയായിരുന്നു. സംഭവത്തിന്റെ സിസി ടിവി ദൃശ്യങ്ങള്‍ പുറത്തുവന്നു.
തലയ്ക്കും കൈകാലുകള്‍ക്കും പരുക്കേറ്റ ഭാര്യയുടെ പരാതിയിലാണ് അംബോലി പോലീസ് കേസെടുത്തത്. അന്ധേരി വെസ്റ്റിലെ പാര്‍പ്പിട സമുച്ചയത്തിന്റെ പാര്‍ക്കിങ് ഏരിയയില്‍ ഒക്ടോബര്‍ 19ന് ആയിരുന്നു സംഭവം. കമാലിനെ അന്വേഷിച്ചെത്തിയ ഭാര്യ മറ്റൊരു യുവതിക്കൊപ്പം അയാള്‍ കാറിലിരിക്കുന്നു കണ്ടതിനെ തുടര്‍ന്ന് വാക്കേറ്റമുണ്ടായി.
കമാല്‍ പെട്ടെന്നു കാര്‍ മുന്നോട്ടെടുത്ത് ഭാര്യയെ ഇടിച്ചുവീഴ്ത്തുകയായിരുന്നു. നിലത്തു വീണ അവരുടെ കാലിലൂടെ കാര്‍ കയറിയിറങ്ങി. ദേഹാത്തി ഡിസ്‌കോ എന്ന സിനിമയുടെ നിര്‍മാതാവാണ് കമാല്‍ കിഷോര്‍ മിശ്ര.
