രാഹുലിനെതിരേ കോണ്ഗ്രസിന് കിട്ടിയത് ഒമ്പത് അതിജീവിതമാരുടെ പരാതിയെന്ന് എം.വി. ഗോവിന്ദന് ; മുകേഷ് സിപിഐഎമ്മിന്റെ അംഗമോ ഒരു ബ്രാഞ്ച് മെമ്പര് പോലുമല്ല ; പിന്നെങ്ങിനെ പാര്ട്ടിനടപടിയെടുക്കും ?
തിരുവനന്തപുരം: രാഹുല് ലോകത്തിന്റെ ഏത് ഭാഗത്ത് പോയാലും പൊലീസ് പിടിക്കുമെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദന്. ഇതുവരെ പിടി കൂടാതിരുന്നത് കോണ്ഗ്രസ് സംരക്ഷണയിലായിരുന്നതിനാലാണ് ഇനിയും സംരക്ഷണം ലഭിച്ചാല് പിടികൂടാന് കുറച്ചു കൂടി താമസിക്കുമായിരിക്കുമെന്നും എം വി ഗോവിന്ദന് വ്യക്തമാക്കി.
മുകേഷിന്റെയും രാഹുല് മാങ്കൂട്ടത്തിലിന്റെയും കാര്യം വ്യത്യസ്തമാണ്. രാഹുലിന്റെ രാജി കേരളം ഒന്നടങ്കം ആവശ്യപ്പെടുന്നതാണ്. അതില് താന് പ്രത്യേകിച്ച് ഒന്നും പറയേണ്ട കാര്യമില്ല. മുകേഷ് സിപിഐഎമ്മിന്റെ അംഗമോ ഒരു ബ്രാഞ്ച് മെമ്പര് പോലുമല്ല അങ്ങിനെയുള്ള ഒരാള്ക്കെതിരെ എങ്ങനെ നടപടിയെടുക്കും. കോടതിയുടെ പരിഗണനയിലാണ് മുകേഷിനെതിരായ കേസ്, മുകേഷ് അന്നും ഇന്നും പാര്ട്ടി അംഗമല്ല. മുകേഷ് വിഷയത്തില് പാര്ട്ടി കൃത്യമായ നിലപാട് സ്വീകരിച്ചിട്ടുണ്ട്. കേസിന്റെ അടിസ്ഥാനത്തിലാണ് നടപടി സ്വീകരിക്കുകയെന്നും പറഞ്ഞു.
രാഹുലിനെതിരെ ഒമ്പത് അതിജീവിതമാരുടെ പരാതികള് കെപിസിസി യ്ക്ക് കിട്ടിയെന്നാണ് അറിഞ്ഞതെന്നും എം വി ഗോവിന്ദന് പറഞ്ഞു. ഇനിയും രാഹുലിനെതിരെ പരാതികള് വരും. നിരവധി പരാതികള് രാഹുലിനെതിരെ കിട്ടിയെന്ന് നിരവധി കോണ്ഗ്രസ് നേതാക്കള് പറഞ്ഞിരുന്നതായും പറഞ്ഞു. വഞ്ചിയൂര് കോടതി ഇന്ന് രാഹുലിന്റെ മുന്കൂര് ജാമ്യാപേക്ഷ തള്ളിയിരുന്നു. ഇതിന് പിന്നാലെ കോണ്ഗ്രസ് രാഹുലിനെ പാര്ട്ടിയില് നിന്നു തന്നെ പുറത്താക്കുകയും ചെയ്തിരുന്നു.
