ഷാഫി പറമ്പില് എംപിയെ വടകരയില് തടയാന് തീരുമാനിച്ചിരുന്നില്ലെന്ന് ഡിവൈഎഫ്ഐ ; പ്രതിഷേധത്തിനിടയില് പ്രവര്ത്തകര് അസഭ്യം പറഞ്ഞെന്ന് ആരോപണവുമായി കോണ്ഗ്രസ് എംപിയും
കോഴിക്കോട് : ഷാഫി പറമ്പില് എം.പി. വടകരയില് കാണിച്ചത് ഷോ ആണെന്നും അദ്ദേഹത്തെ തടയണമെന്ന് പ്രവര്ത്തകരോട് ഡിവൈഎഫ്ഐ പറഞ്ഞിട്ടില്ലെന്നും സംസ്ഥാന പ്രസിഡന്റ് വി വസീഫ്. എന്നാല് പ്രതിഷേധത്തിനിടെ ഡിവൈഎഫ്ഐ പ്രവര്ത്തകര് തന്നെ അസഭ്യം വിളിച്ചെന്ന ആരോപിച്ചു ഷാഫി പറമ്പില് എംപിയും രംഗത്ത് വന്നു.
ഡിവൈഎഫ്ഐ നടത്തിയ പ്രതിഷേധത്തെ പ്രകോപനമായി നേരിട്ടത് എംപിയാണെന്നാണ് ഡിവൈഎഫ്ഐ യുടെ ആരോപണം. വടകരയില് നടന്ന സംഭവത്തെ അക്രമത്തിലേക്ക് കൊണ്ടു പോകാനായിരുന്നു അദ്ദേഹം ശ്രമം നടത്തിയിരുന്നതെന്നും കെപിസിസി യുടെ വര്ക്കിംഗ് പ്രസിഡന്റിന്റെ മാന്യത പോലും ഷാഫി കാണിച്ചില്ലെന്നും വി വസീഫ് വ്യക്തമാക്കി. ഷാഫി പറമ്പിലിനെ വടകരയില് പരസ്യമായി തടയാന് ഡിവൈഎഫ്ഐ തീരുമാനിച്ചിട്ടില്ലെന്ന് ജില്ലാ സെക്രട്ടറി പി സി ഷൈജുവും വ്യക്തമാക്കിയിരുന്നു.
ഷാഫി പറമ്പില് എം പി ഒരുകൂട്ടം ആളുകളെ സംഘടിപ്പിച്ച് പ്രകോപനം ഉണ്ടാക്കാന് വേണ്ടിയിട്ടുള്ള ബോധപൂര്വ്വമായ ശ്രമം നടത്തുകയാണെന്നും പി സി ഷൈജു ആരോപിച്ചു. വടകരയില് ഓണാഘോഷ പരിപാടിയില് പങ്കെടുത്തതിന് ശേഷം ടൗണ്ഹാളിന് സമീപം വെച്ചായിരുന്നു ഷാഫി പറമ്പില് എംപിയുടെ വാഹനം ഡിവൈഎഫ്ഐ പ്രവര്ത്തകര് തടഞ്ഞത്. ഇതോടെ പ്രതിഷേധക്കാര്ക്ക് മുന്നിലേക്ക് ഷാഫിപറമ്പില് ഇറങ്ങി വരികയായിരുന്നു.
ഷാഫി കാറില്നിന്ന് റോഡിലേക്ക് ഇറങ്ങുന്നത് തടയാന് പൊലീസ് ശ്രമിച്ചെങ്കിലും പൊലീസിനെ മാറ്റി റോഡിലിറങ്ങുകയായിരുന്നു. ഇതോടെ നേര്ക്കുനേര് ഡിവൈഎഫ്ഐ പ്രവര്ത്തകരുമായി വാക് തര്ക്കമായി. വടകര അങ്ങാടിയില്നിന്ന് പേടിച്ച് പോകാന് തീരുമാനിച്ചിട്ടില്ലെന്ന് പറഞ്ഞാണ് ഷാഫി കാറില് നിന്നിറങ്ങിയത്. സമരം ചെയ്യാന് എല്ലാവര്ക്കും അവകാശമുണ്ടെന്നും അതിന്റെ പേരില് ആഭാസത്തരം കാണിച്ചാല് വകവെച്ച് നല്കില്ലെന്നും ഷാഫി പറമ്പില് പറഞ്ഞു.
