വടകര: നെല്ലാച്ചേരി കുനിക്കുളങ്ങര ടവറിനു സമീപത്ത് രണ്ട് യുവാക്കളെ മരിച്ച നിലയില്‍ കണ്ടെത്തി. കുന്നുമ്മക്കര തോട്ടോളി ബാബുവിന്റെ മകൻ അക്ഷയ് (26), ഓർക്കാട്ടേരി കാളിയത്ത് ശങ്കരന്റെ മകൻ രണ്‍ദീപ് (30) എന്നിവരാണ് മരിച്ചത്.
രാവിലെ 8 മണിയോടെയാണ് ഇവരെ മരിച്ച നിലയില്‍ കണ്ടെത്തിയത്. രണ്‍ദീപിനെയും അക്ഷയ്‌യേയും കാണാതായതിനെത്തുടർന്ന് സുഹൃത്തുക്കളും നാട്ടുകാരും ചേർന്ന് തിരച്ചില്‍ നടത്തുകയായിരുന്നു. ഇതിനിടയിലാണ് ആളൊഴിഞ്ഞ പറമ്ബില്‍ ഇരുവരുടെയും മൃതദേഹങ്ങള്‍ കണ്ടെത്തിയത്.
അതേസമയം ഇവരുടെ കൂടെയുണ്ടായിരുന്ന യുവാവിനെ അവശ നിലയില്‍ കണ്ടെത്തി. ചെറിയതുരുത്തി സ്വദേശി ശ്രീരാഗിനെയാണ് അവശനിലയിൽ കണ്ടെത്തിയത്.ഇയാളെ നാട്ടുകാര്‍ ചേര്‍ന്ന് ആശുപത്രിയില്‍ പ്രവേശിപ്പിച്ചിരിക്കുകയാണ്.
മൃതദേഹത്തിന് സമീപത്തുനിന്ന് സിറിഞ്ചുകള്‍ കണ്ടെത്തിയിട്ടുണ്ട്.അമിത അളവില്‍ ലഹരി ഉപയോഗിച്ചതാകാം മരണകാരണം എന്നാണ് പോലീസ് സംശയിക്കുന്നത് സംഭവസ്ഥലത്ത് പോലീസ് പരിശോധന നടത്തിവരികയാണ്.
