18 മുതല്‍ 25 വരെ നീണ്ടുനില്‍കുന്ന ആഘോഷ പരിപാടിയില്‍ മെഗാ കരോള്‍ ഗാനമത്സരം, പുല്‍ക്കൂട് നിര്‍മാണ മത്സരം, ക്രിസ്മസ് ട്രീ അലങ്കാര മത്സരം എന്നിവ വിവിധ മെട്രോ സ്‌റ്റേഷനുകളില്‍ നടക്കും. കൈനിറയെ സമ്മാനങ്ങള്‍ നേടാനുള്ള അവസരമാണ് കൊച്ചി മെട്രോ ഒരുക്കിയിരിക്കുന്നത്.
18ന് വൈകിട്ട് അഞ്ചുമുതല്‍ നടക്കുന്ന മെഗാ കരോള്‍ ഗാന മത്സരമാണ് പ്രധാന ഹൈലൈറ്റ്. കേരളത്തിന്‍റെ വിവിധ ഭാഗങ്ങളില്‍നിന്നുള്ള സംഘങ്ങള്‍ മത്സരത്തില്‍ പങ്കെടുക്കും. എറണാകുളം ജോസ് ജംഗ്ഷനിലുള്ള കൊച്ചി മെട്രോയുടെ ഓപ്പണ്‍ എയര്‍ തിയറ്ററിലാണ് മത്സരം. രജിസ്റ്റര്‍ ചെയ്യുന്ന ആദ്യ 20 ടീമുകള്‍ക്കാണ് അവസരം.
കരോള്‍ ഗാന മത്സരത്തിലെ ജേതാവിന് ഡോണറ്റ് ഫാക്ടറി നല്‍കുന്ന 50,000 രൂപയാണ് സമ്മാനം. രണ്ടാം സ്ഥാനത്ത് എത്തുന്ന സംഘത്തിന് കീര്‍ത്തി നിര്‍മല്‍ നല്‍കുന്ന 25,000 രൂപ ക്യാഷ് പ്രൈസും, മൂന്നാം സ്ഥാനക്കാര്‍ക്ക് എഥര്‍ ഓട്ടോസ്റ്റാര്‍ക്ക് എനര്‍ജി നല്‍കുന്ന 10,000 രൂപ ക്യാഷ്‌പ്രൈസും ലഭിക്കും. ഗ്രീറ്റ്‌സ് പബ്ലിക് സ്‌കൂളിലെ വിദ്യാര്‍ഥികള്‍ അവതരിപ്പിക്കുന്ന ബാന്‍ഡ് മേളവും മത്സരത്തിന് മുന്നോടിയായി അരങ്ങേറും.
20ന് വിവിധ മെട്രോ സ്‌റ്റേഷനുകളില്‍ പുല്‍ക്കൂട് നിര്‍മാണ മത്സരവും ക്രിസ്മസ് ട്രീ അലങ്കാര മത്സരവും നടക്കും. 5000, 3000, 2000 രൂപ വീതമുള്ള ക്യാഷ് പ്രൈസുകളാണ് ഇരു മത്സരങ്ങളിലെയും ആദ്യ മൂന്ന് വിജയികള്‍ക്ക് ലഭിക്കുക.
18 മുതല്‍ ക്രിസ്മസ് ദിനം വരെ കൊച്ചി മെട്രോയില്‍ യാത്ര ചെയ്യുന്നവര്‍ക്ക് മെട്രോ സാന്‍റയെ കണ്ടുമുട്ടുവാനും ക്രിസ്മസ് സമ്മാനം നേടാനും അവസരമുണ്ട്. മത്സരങ്ങളുടെ രജിസ്‌ട്രേഷന്‍ സൗജന്യമായിരിക്കും. മത്സരങ്ങളില്‍ പങ്കെടുക്കുന്നതിനായി +91 4842846777, +91 98479 76380 എന്നീ നമ്ബറുകളില്‍ വിളിക്കാം.
കൊച്ചി മെട്രോയുടെ വെബ്‌സൈറ്റ്, ഫേസ്ബുക്ക്, ഇന്‍സ്റ്റാഗ്രാം പേജിലും മത്സരത്തിന്‍റെ വിശദാംശങ്ങള്‍ ലഭ്യമാണ്.
