ട്രെയിനിനെ  27 കിലോമീറ്റർ ഓടിത്തോൽപ്പിച്ച് ഓട്ടോറിക്ഷ ;മിസ്സായ അതേ ട്രെയിനിൽ യാത്രക്കാരനെ കയറ്റിവിട്ട് താരമായി ഓട്ടോഡ്രൈവർ

ആദിൽ ഹുസൈനെന്ന ഐ.ടി. ജീവനക്കാരനാണ് ഓട്ടോയിലുള്ള തന്റെ സാഹസികയാത്ര എക്സിൽ പങ്കുവെച്ചത്. ഉച്ചക്ക് 1.40-നുള്ള പ്രശാന്തി എക്സ്പ്രസിലായിരുന്നു ആദിലിന് പോവേണ്ടിയിരുന്നത്. എന്നാൽ ഗതാഗത കുരുക്ക് കാരണം 17 കിലോമീറ്റർ അകലെയുള്ള റെയിൽവെ സ്റ്റേഷനിൽ സമയത്തിനെത്താൻ ആദിലിന് കഴിഞ്ഞില്ല.സ്റ്റേഷനിലെത്തിയപ്പോഴേക്കും ട്രെയിൻ പുറപ്പെട്ടും കഴിഞ്ഞിരുന്നു.ഒടുവിൽ നിസ്സഹായനായി നിൽക്കവേയാണ് ഒരു ഓട്ടോക്കാരൻ ആദിലിനെ സമീപിക്കുന്നത്.

അടുത്ത സ്റ്റോപ്പായ യെൽഹങ്ക റെയിൽവെ സ്റ്റേഷനിലെത്തിക്കാമെന്നും അവിടെ വെച്ച് ട്രെയിനിൽ കയറാമെന്നും ഓട്ടോ ഡ്രൈവർ പറഞ്ഞു. 27 കിലോമീറ്റർ അകലെയുള്ള സ്റ്റേഷനിൽ ട്രെയിൻ എത്തുന്നതിന് മുമ്പ് എങ്ങനെ എത്തുമെന്ന് സംശയം പ്രകടിപ്പിച്ച ആദിലിനോട് ട്രെയിൻ കിട്ടിയാൽ മാത്രം പണം നൽകിയാൽ മതിയെന്നും ഓട്ടോ ഡ്രൈവർ പറഞ്ഞു.

ഡ്രൈവറുടെ ആത്മവിശ്വാസം കണ്ടപ്പോൾ ഒരു കൈ നോക്കാമെന്ന് ആദിലിനും തോന്നി. അങ്ങനെ ആദിൽ ഓട്ടോയിൽ പുറപ്പെട്ടു. ഗതാഗത കുരുക്കിൽപ്പെടാതെ തനിക്കറിയുന്ന ഊടുവഴികളിലൂടെയെല്ലാം ഓട്ടോ പറപ്പിക്കുകയായിരുന്നു ഡ്രൈവർ എന്ന് ആദിൽ പറയുന്നു. അങ്ങനെ 2.20-ന് ട്രെയിൻ എത്തുന്നതിന് 5 മിനിറ്റു മുമ്പ് ആദിലിനെ  ഓട്ടോഡ്രൈവർ സ്റ്റേഷനിലെത്തിക്കുകയും ചെയ്തു.