അരങ്ങേറ്റം കുറിച്ച ശ്രേയസ് ഗോപാലിൻ്റെ മികവിലാണ് തകര്‍പ്പൻ വിജയം കേരളം നേടിയത്.മത്സരത്തില്‍ കേരളം ഉയര്‍ത്തിയ 164 റണ്‍സിൻ്റെ വിജയലക്ഷ്യം പിന്തുടര്‍ന്ന ഹിമാചല്‍ പ്രദേശിന് 19.1 ഓവറില്‍ 128 റണ്‍സ് എടുക്കുന്നതിനിടെ മുഴുവൻ വിക്കറ്റും നഷ്ടമായി. 4 ഓവറില്‍ 17 റണ്‍സ് വഴങ്ങി നാല് വിക്കറ്റ് നേടിയ ശ്രേയസ് ഗോപാലും 3.1 ഓവറില്‍ 22 റണ്‍സ് വഴങ്ങി നാല് വിക്കറ്റ് നേടിയ വിനോദ് കുമാറുമാണ് കേരളത്തിന് കരുത്തായത്.
കേരളത്തിന് വേണ്ടിയുള്ള ശ്രേയസ് ഗോപാലിൻ്റെ അരങ്ങേറ്റ മത്സരം കൂടിയായിരുന്നു ഇത്. ഐ പി എല്ലില്‍ സഞ്ജുവിനൊപ്പം കളിച്ചിട്ടുള്ള താരം ഈ സീസണിലാണ് കര്‍ണാടകയില്‍ നിന്നും കേരളത്തിലേക്ക് മാറിയത്.
നേരത്തെ ആദ്യം ബാറ്റ് ചെയ്ത കേരളം 27 പന്തില്‍ 44 റണ്‍സ് നേടിയ വിഷ്ണു വിനോദ്, 20 പന്തില്‍ 30 റണ്‍സ് നേടിയ സച്ചിൻ ബേബി എന്നിവരുടെ മികവിലാണ് 20 ഓവറില്‍ 8 വിക്കറ്റ് നഷ്ടത്തില്‍ 163 റണ്‍സ് നേടിയത്. ക്യാപ്റ്റൻ സഞ്ജു സാംസണ് ഒരു റണ്‍ നേടാൻ മാത്രമെ സാധിച്ചുള്ളൂ.
നാളെ സര്‍വീസസിനെതിരെയാണ് കേരളത്തിൻ്റെ അടുത്ത മത്സരം.
