മാവേലിക്കര:പലിശക്കാരെ ഭയന്നോടിയ കെട്ടിടനിര്‍മാണത്തൊഴിലാളി ട്രെയിൻതട്ടി മരിച്ചു.മേനാമ്ബള്ളി തറയില്‍ കിഴക്കതില്‍ എസ് സജി (45) ആണ് മരിച്ചത്.
ചെട്ടികുളങ്ങര മേനാമ്ബള്ളിയില്‍ വ്യാഴം വൈകിട്ട് 6.45 നാണ് സംഭവം. ക്രിമിനല്‍ കേസുകളില്‍ പ്രതിയും മീറ്റര്‍പലിശ ഇടപാടുകാരനുമായ ബൈജുവും സംഘവും വീട്ടിലെത്തി സ്ത്രീകളെയടക്കം അസഭ്യം പറഞ്ഞ് ഭീഷണിപ്പെടുത്തിയെന്നും സജിയെ തട്ടിക്കൊണ്ടുപോകാൻ ശ്രമിച്ചെന്നും അച്ഛൻ സഹദേവൻ പറയുന്നു.
തട്ടിക്കൊണ്ടുപോകാൻ ശ്രമിച്ചപ്പോള്‍സജി പേടിച്ചോടി. സംഘം പിന്തുടര്‍ന്നതോടെ സമീപത്തുള്ള റെയില്‍വേ ട്രാക്കിലൂടെ ഓടിയ സജി എതിര്‍ ദിശയില്‍നിന്ന് വന്ന ട്രെയിൻതട്ടി മരിക്കുകയായിരുന്നു.
എസ്‌എൻഡിപി യോഗം മേനാമ്ബള്ളി 377 -ാം നമ്ബര്‍ ശാഖാ സെക്രട്ടറിയാണ് സജി. സംസ്കാരം ശനി പകല്‍ രണ്ടിന്. ഭാര്യ: സംഗീത. മകള്‍: ആരാധന.
