കോട്ടയം: പുതുപ്പള്ളി ഉപതിരഞ്ഞെടുപ്പിന്റെ കൊട്ടിക്കലാശം അവസാനിച്ചതിന് പിന്നാലെ വൈകാരികമായി പ്രതികരിച്ച് ഉമ്മൻചാണ്ടിയുടെ മകൾ അച്ചു ഉമ്മൻ.
പുതുപ്പള്ളിക്കാര്‍ ഉമ്മൻ ചാണ്ടിക്ക് നല്‍കുന്ന വലിയ യാത്ര അയപ്പ് നാളെയാണെന്നും അപ്പയുടെ ഏറ്റവും വലിയ ഭൂരിപക്ഷത്തെ മറികടക്കണമെന്നുമാണവർ പറഞ്ഞത്.ഉമ്മൻ ചാണ്ടിയുടെ മകനും അച്ചു ഉമ്മന്റെ സഹോദരനുമായ ചാണ്ടി ഉമ്മനാണ് പുതുപ്പള്ളിയിലെ യുഡിഎഫ് സ്ഥാനാർത്ഥി.
ഉമ്മന്‍ ചാണ്ടിയുടെ അവസാന യാത്രയയപ്പിന്‍റെ ഇടിമുഴക്കം വോട്ടെണ്ണല്‍ ദിവസം കേള്‍ക്കണമെന്നും അവർ കൂട്ടിച്ചേർത്തു.
ഈ തെരഞ്ഞെടുപ്പില്‍ സര്‍ക്കാര്‍ വിരുദ്ധ വികാരം ഉണ്ട്. കോണ്‍ഗ്രസിന് ഇത്രയധികം അനുകൂല സാഹചര്യം ഉള്ള തെരഞ്ഞെടുപ്പ് നേരത്തെ ഉണ്ടായിട്ടില്ല. എല്ലാത്തിനും ഉപരി ഉമ്മൻ ചാണ്ടി എന്ന ഘടകം നിലവിലുണ്ട്. ഈ സാഹചര്യങ്ങള്‍ നിലനില്‍ക്കുന്നതു കൊണ്ടാണ് എതിര്‍ ഭാഗം ആരോപണങ്ങളും വിവാദങ്ങളും ഉണ്ടാക്കുന്നത്. ഉമ്മൻ ചാണ്ടിയുടെ ചികിത്സ വിവാദം ഉയര്‍ത്തിയതും അതുകൊണ്ടാണെന്നും അച്ചു ഉമ്മന്‍ പറഞ്ഞു.
സൈബര്‍ ആക്രമണ കേസില്‍ പോലീസിന് മൊഴി കൊടുത്തു. ഇനി നടപടികള്‍ മുന്നോട്ട് കൊണ്ട് പോകേണ്ടത് പോലീസാണ്. നടപടികള്‍ വൈകുന്നത് എന്ത് കൊണ്ട് എന്നറിയില്ലെന്നും അവര്‍ പറഞ്ഞു.
