പത്തനാപുരം:ഒരേ സമയം രണ്ടു യുവാക്കളെ വിവാഹം കഴിക്കാൻ രജിസ്ട്രാർ ഓഫീസുകളിൽ അപേക്ഷ നൽകി പത്തനാപുരം സ്വദേശിനിയായ യുവതി.
സ്പെഷൽ മാര്യേജ് ആക്ട് പ്രകാരം ആദ്യം പത്തനാപുരം സബ് രജിസ്ട്രാർ ഓഫീസിലാണ് യുവതി അപേക്ഷ നൽകിയത്.ജൂൺ 30ന് നൽകിയ അപേക്ഷയിൽ പത്തനാപുരത്ത് തന്നെയുള്ള യുവാവുമായി വിവാഹം കഴിക്കണമെന്നാണ് യുവതി ആവശ്യപ്പെട്ടിരിക്കുന്നത്. എന്നാൽ ഇതിന് പിന്നാലെ കഴിഞ്ഞ ദിവസം പുനലൂർ സബ് രജിസ്ട്രാർ ഓഫീസിൽ പുനലൂർ ഉറുകുന്ന് സ്വദേശിയായ യുവാവുമായി വിവാഹം കഴിക്കണമെന്ന് ആവശ്യപ്പെട്ട് ഇതേ യുവതി മറ്റൊരു അപേക്ഷയും നൽകി.
യുവതി പത്തനാപുരം സ്വദേശി ആയതിനാൽ ഈ അപേക്ഷയിൽ ആക്ഷേപം സ്വീകരിക്കുന്നതിനും പ്രസിദ്ധീകരിക്കുന്നതിന്റെയും ഭാഗമായി നോട്ടിസ് പത്തനാപുരം സബ് രജിസ്ട്രാർ ഓഫിസിലെത്തിയപ്പോഴാണ് സംഭവം പുറത്തറിയുന്നത്. രണ്ട് രജിസ്ട്രാർ ഓഫിസുകളിൽ അപേക്ഷ സ്വീകരിച്ചതോടെ ഉദ്യോഗസ്ഥരും കുരുക്കിലായി. അപേക്ഷ നൽകിയ യുവതിയെയും, യുവാക്കളെയും വിളിച്ചു വരുത്തി കാര്യം അന്വേഷിക്കാനുള്ള ശ്രമത്തിലാണ് ഉദ്യോഗസ്ഥർ.
