ചെന്നൈ: മീടു ആരോപണം നേരിടുന്ന തമിഴ് ഗാന രചിതാവും, കവിയുമായ വൈരമുത്തുവിനെ വീട്ടിൽ സന്ദർശിച്ച തമിഴ്നാട് മുഖ്യമന്ത്രി എംകെ സ്റ്റാലിനെതിരെ ഗായിക ചിന്മയി രംഗത്ത്. വൈരമുത്തുവിൻറെ എഴുപതാം ജന്മദിനത്തിനോട് അനുബന്ധിച്ചാണ് എംകെ സ്റ്റാലിൻ അദ്ദേഹത്തിൻറെ ബസന്ത് നഗറിലെ വീട്ടിലെത്തി പൊന്നാട അണിയിച്ച് ആദരിച്ചത്. ഇതിനെതിരെയാണ് വൈരമുത്തുവിനെതിരെ ആരോപണവുമായി എത്തിയ ചിന്മയി വിമർ‌ശിച്ചത്.
2018 മുതൽ തമിഴ് സിനിമ രംഗത്ത് തനിക്ക് വിലക്കാണെന്ന് വീണ്ടും ആരോപിക്കുന്നുണ്ട് ചിന്മയി. പല അവർഡുകൾ നേടിയ ഡിഎംകെയുടെ പിന്തുണയുള്ള കവിക്കെതിരെ ആരോപണം ഉന്നയിച്ചുവെന്നതാണ് കാരണം. നിരവധി സ്ത്രീകൾ പരാതി പറഞ്ഞ ഒരാളെയാണ് മുഖ്യമന്ത്രി വീട്ടിലെത്തി ആദരിച്ചത്. ഇത് ശരിക്കും നാണക്കേട് ഉണ്ടാക്കുന്ന സംഗതിയാണെന്ന് സോഷ്യൽ മീഡിയ കുറിപ്പിൽ ചിന്മയി പറയുന്നു.
അഞ്ച് വർഷത്തോളമായി തനിക്ക് നീതി ലഭിച്ചില്ലെന്നും, നിങ്ങൾക്ക് നീതി കിട്ടുന്നത് ഒന്ന് കാണണം എന്ന രീതിയിൽ ആക്രോശിക്കുകയാണ് എതിരാളികൾ എന്നും ചിന്മയി ആരോപിക്കുന്നു. പതിറ്റാണ്ടുകൾക്ക് മുൻപ് ജനിച്ചതിനാൽ ഏത് സ്ത്രീക്ക് മുകളിലും തനിക്ക് കൈവയ്ക്കാം എന്നാണ് കവിയുടെ ധാരണ. പത്മ പുരസ്കാരങ്ങളും, ദേശീയ അവാർഡുകളും നേടിയ കവിക്ക് രാഷ്ട്രീയക്കാരുമായി അടുത്ത ബന്ധമുണ്ട് അതാണ് അയാൾക്ക് ഇത്ര ധൈര്യം ചിന്മയി പറയുന്നു.
കഴിഞ്ഞ മാസം ഗായിക ഭുവന ശേഷനും വൈരമുത്തുവിനെതിരെ രംഗത്ത് വന്നിരുന്നു. തമിഴ്‌നാട്ടിലെ ഡിഎംകെ സർക്കാർ പ്രശസ്ത എഴുത്തുകാരെ ആദരിക്കാൻ വേണ്ടി തുടങ്ങിയ ഡ്രീം ഹൗസ് പദ്ധതിയിൽ വൈരമുത്തുവിനെ ആദരിച്ചതിന് പിന്നാലെയാണ് ഗായിക ആരോപണങ്ങൾ കടുപ്പിച്ചത്.
“ഏതാണ്ട് 17 സ്ത്രീകൾ വൈരമുത്തുവിനെതിരെ ആരോപണങ്ങൾ ഉന്നയിച്ചിട്ടുണ്ട്, എന്നാൽ അവരിൽ നാലുപേർക്ക് മാത്രമേ മുഖം കാണിക്കാനും ആരോപണങ്ങൾ പരസ്യമായി പറയാനും തയ്യാറായുള്ളൂ. പീഡിപ്പിക്കപ്പെട്ട അവസ്ഥയിൽ നിന്നും കരകയറാൻ പ്രയാസമാണ്. പല യുവ ഗായകരുടെ സ്വപ്നമാണ് തകർത്തത്. മറ്റൊരു പെൺകുട്ടിയോട് ഇത് ചെയ്യാതിരിക്കാനാണ് ഇതെല്ലാം തുറന്നു പറയുന്നത്” -ഭുവന ശേഷൻ പറഞ്ഞു. മീ ടൂ ആരോപണ വിധേയനായ വൈരമുത്തുവിനെ ഡ്രീം ഹൗസ് പദ്ധതിയിൽ ഉൾപ്പെടുത്താനുള്ള തമിഴ്നാട് സർക്കാർ തീരുമാനം സോഷ്യൽ മീഡിയയിൽ വലിയ ചർച്ചയായിരുന്നു അന്ന്.
