നുണക്കുഴി കവിളുള്ള ‘സിത്തുമണി’യുടെ കുട്ടിക്കാല ഫോട്ടോ ഇൻസ്റ്റായിൽ പങ്കുവച്ച് താരം; ഏറ്റെടുത്ത് ആരാധകർ
സിനിമാ താരങ്ങളുടെയും പ്രിയ ഗായകരുടെയും കുട്ടിക്കാല ഫോട്ടോകൾ കാണാൻ പ്രേക്ഷകർ ഏറെ താല്പര്യം കാണിക്കാറുണ്ട്. പ്രത്യേകിച്ച് മുൻനിര നായികാനായകന്മാരുടെയും ഗായകരുടേയും. ഇത്തരം ചിത്രങ്ങൾ സോഷ്യൽ മീഡിയകളിൽ ട്രെഡിംഗ് ആകാറുമുണ്ട്. ഇപ്പോഴിതാ മലയാളികൾക്ക് ഏറെ പ്രിയങ്കരിയായ ഒരു ഗായികയുടെ കുട്ടിക്കാല ഫോട്ടോയാണ് പുറത്തുവരുന്നത്. വ്യത്യസ്തമായ ആലാപനശൈലി കൊണ്ട് മലയാളികളുടെ ഒന്നടങ്കം പ്രിയങ്കരിയായ സിത്താര കൃഷ്ണകുമാറിന്റേതാണ് ഫോട്ടോ. സിത്തുമണി എന്ന് മലയാളികൾ വിളിക്കുന്ന താരം തന്നെയാണ് ഫോട്ടോ പങ്കുവച്ചിരിക്കുന്നത്. ‘എനിക്ക് അവളെപോലെ എന്നും സന്തോഷവതിയായി ഇരിക്കണം’ എന്നാണ് അടിക്കുറിപ്പായി നൽകിയിരിക്കുന്നത്. പങ്കുവച്ച് നിമിഷങ്ങൾക്കകം ഫോട്ടോ വൈറലായി കഴിഞ്ഞു.
View this post on Instagram
“സ്വത്തുമണി, സിത്തുമണി വളരെ ക്യൂട്ടാണ്, കാണാൻ എന്തൊരു നിഷ്‌കളങ്കതയാണ്, ദൈവാനുഗ്രഹത്താൽ എന്നും സന്തോഷത്തോടെ ജീവിക്കാൻ സാധിക്കട്ടെ”,എന്നിങ്ങനെ പോകുന്നു കമന്റുകൾ. എന്തൊരു മാറ്റമാണെന്നാണ് ഭൂരിഭാഗം പേരും കമന്റ് ചെയ്തിരിക്കുന്നത്. വേറിട്ട ശബ്ദത്തിലൂടെ മലയാളികൾക്ക് മുന്നിലേക്ക് എത്തിയ സിത്താര ഇതിനോടകം സമ്മാനിച്ചത് ഒട്ടനവധി ഗാനങ്ങളാണ്. ടെലിവിഷൻ ചാനലുകളിലെ സംഗീത പരിപാടികളിലൂടെയും റിയാലിറ്റിഷോകളിലൂടെയുമാണ് സിത്താര ചലച്ചിത്രലോകത്തേക്ക് എത്തുന്നത്. മികച്ച പിന്നണിഗായികയ്ക്കുള്ള 2012ലെ കേരളസംസ്ഥാന ചലച്ചിത്രപുരസ്‌കാരവും സിത്താരയെ തേടി എത്തിയിരുന്നു.
അടുത്തിടെ സിത്താരയ്ക്ക് ഗോൾഡൻ വിസ ലഭിച്ചിരുന്നു. പത്ത് വർഷത്തെ കാലാവധിയുള്ള ഈ വിസകൾ, കാലാവധി പൂർത്തിയാവുമ്പോൾ പുതുക്കി നൽകുകയും ചെയ്യും. പ്രമുഖ നടന്മാരടക്കം നിരവധി മലയാളികൾക്ക് ഇതിനോടകം തന്നെ ഗോൾഡൻ വിസ ലഭ്യമായിട്ടുണ്ട്. . പ്രണവ് മോഹൻലാൽ, മമ്മൂട്ടി, മോഹൻലാൽ, പൃഥ്വിരാജ്, ദുൽഖർ സൽമാൻ, നൈല ഉഷ, ടൊവിനോ തോമസ്, ആശാ ശരത്, ആസിഫ് അലി, മിഥുൻ രമേശ്, ലാൽ ജോസ്, മീര ജാസ്മിൻ, സംവിധായകൻ സലീം അഹമ്മദ്, സിദ്ദിഖ്, ഗായിക കെ എസ് ചിത്ര, സുരാജ് വെഞ്ഞാറമൂട്, നിർമ്മാതാവ് ആൻറോ ജോസഫ്, മീന, ദിലീപ് തുടങ്ങിയവർ ഗോൾഡൻ വിസ സ്വീകരിച്ചിരുന്നു.
