പെൺകുട്ടികൾക്ക് ജീവിക്കാൻ വയ്യാത്ത നാടായോ കേരളം; പെൺകുട്ടികളുള്ള അച്ഛനമ്മമാർ വായിച്ചറിയാൻ

കേരളത്തിൽ പെൺകുട്ടികൾക്കെതിരെ അതിക്രമങ്ങൾ വർദ്ധിക്കുന്നുവെന്നാണ് ഓരോദിവത്തേയും കണക്കുകൾ സൂചിപ്പിക്കുന്നത്.ദിവസവും ഒരു പീഡനക്കേസെങ്കിലും ഇല്ലാതെ പത്രങ്ങൾ പുറത്തിറങ്ങുന്നില്ലെന്നാണ് വാസ്തവം.രണ്ട് വയസ്സുകാരി മുതൽ തൊണ്ണൂറുകാരി വരെ പീഡിപ്പിക്കപ്പെടുന്നു.വാട്‌സ്ആപ്, ഫേസ്ബുക്ക് കെണികളിൽപ്പെട്ട് പീഡനത്തിന് ഇരയാകുന്നവരുടെ എണ്ണവും കൂടുന്നുണ്ട്.പോക്‌സോ കേസുകളിൽ അടക്കം വർദ്ധനവാണ് രേഖപ്പെടുത്തിയിരിക്കുന്നത്.

പോലീസ് ക്രൈം രജിസ്റ്റർ ചെയ്തത് അനുസരിച്ച് 2021ൽ 16,418 അതിക്രമങ്ങളാണ് സംസ്ഥാനത്തുണ്ടായത്. 2020ൽ ഇത് 12,659 അതിക്രമങ്ങൾ ആയിരുന്നു. ഈ വർഷം ഇതുവരെ 1,747 കേസുകൾ രജിസ്റ്റർ ചെയ്തിട്ടുണ്ട്. ദൈവത്തിന്റെ സന്തം നാടെന്ന പേരിൽ ലോകത്തിന് മുന്നിൽ അഭിമാനം കൊള്ളുന്ന കേരളത്തിൽ സ്ത്രീകൾ പ്രത്യേകിച്ച്, പെൺകുട്ടികൾ ഒട്ടും സുരക്ഷിതരല്ലെന്നാണ് കണക്കുകൾ സൂചിപ്പിക്കുന്നത്.

ഇത് കേരളത്തിന്റെ മാത്രം കാര്യമല്ല.രാജ്യത്തെ മൊത്തം കണക്കെടുത്താൽ നമ്മൾ ഞെട്ടിപ്പോകും.അത്രയ്ക്കും ഭീകരമാണ് പെൺകുട്ടികളുടെ ഇന്നത്തെ ജീവിതം.

ഇക്കാര്യത്തിൽ ഏറ്റവും ശ്രദ്ധിക്കേണ്ടത് അമ്മമാരാണ്.പെൺകുട്ടികളുടെ സ്വഭാവത്തിലും പെരുമാറ്റത്തിലും അമ്മമാരുടെ സ്വാധീനമാണ് കൂടുതൽ ഉണ്ടാകുന്നത്.അ മ്മമാരിൽ പലരും ഇത് വേണ്ടത്ര തിരിച്ചറിയാറില്ലെങ്കിൽപ്പോലും. കുട്ടികളുടെ മുന്നിൽ പെരുമാറ്റവും വാക്കുകളും സൂക്ഷിച്ചു വേണം ഉപയോഗിക്കാൻ.എന്തു പറയുന്നു എന്നു മാത്രമല്ല, എങ്ങനെ പറയുന്നു എന്നതും ശ്രദ്ധിക്കണം. നല്ല വാക്കുകളും നല്ല സംസാരരീതിയും അച്ഛനമ്മമാരും ശീലിക്കണം.അമ്മയുടെ വഴിവിട്ട ജീവിതം കണ്ട് നശിച്ചുപോയ എത്രയോ പെൺകുട്ടികൾ ഇവിടെയുണ്ട്.അച്ഛന്റെ മദ്യപാനവും പേക്കൂത്തും കണ്ട്, എങ്ങനെയെങ്കിലും രക്ഷപെട്ടാൽ മതിയെന്ന് ചിന്തിച്ചു വീടുവിട്ടിറങ്ങി ചതിക്കുഴികളിൽ പെട്ട എത്രയോ പെൺകൊടികൾ…!

അച്ഛന്റെ ശ്രദ്ധയും  വാക്കുകളും  സമീപനവും പെൺകുട്ടികളെ വളർച്ചയുടെ ഏതു ഘട്ടത്തിലും സ്വാധീനിക്കും എന്നത് മറക്കരുത്. ‘എന്റെ മോൾ സുന്ദരിയാണ്’ എന്നൊരച്ഛൻ പറയുന്നതിലേറെ സന്തോഷമുണ്ടാകും ‘എത്ര ബുദ്ധിപൂർവമാണെന്റെ മോൾ പ്രശ്നം കൈകാര്യം ചെയ്യുന്നത്’ എന്നോ ‘അനിയത്തിയുടെ കാര്യങ്ങൾ അവൾ എത്ര സ്നേഹത്തോടെയാണ് ചെയ്തു കൊടുക്കുന്നത്’ എന്നോ  പറഞ്ഞു കേൾക്കുമ്പോൾ.