കുർബാനയും പള്ളിപ്പെരുന്നാളും കല്യാണങ്ങളുമാണ് കൈനകരിയുടെ ‘ദേശീയോത്സവ’ങ്ങൾ.നെഹ്റു ട്രോഫി വള്ളം കളിയെ ഒളിംപിക്സിനെക്കാൾ വലുപ്പത്തിൽ ഹൃദയത്തിലേറ്റുന്ന കൈനകരിയുടെ ചുണക്കുട്ടികൾക്ക് തുഴപ്പാടിന്റെ ആവേശം ജന്മനാ കിട്ടിയതാണ്.
ചായ കുടിക്കാൻ ഒരു കട. പലചരക്കു വിൽക്കുന്ന ഒരു സ്ഥാപനം. പടമെടുക്കാൻ ഒരു ഫോട്ടോഗ്രാഫർ.ആശാരിപ്പണിക്ക് ഒരു കുടുംബം.അങ്ങനെ ആ നാടിന്റെ ആവശ്യങ്ങൾ നിറവേറ്റാനുള്ള ആളുകൾ മാത്രം. ‘ആകെ മൊത്തം ടോട്ടൽ’ കൂട്ടിപ്പറഞ്ഞാൽ ഗ്രാമ തനിമ വിട്ടു മാറാത്ത കേരളത്തിലെ അവശേഷിക്കുന്ന ഗ്രാമങ്ങളിൽ ഒന്ന്.
വാഹനങ്ങളുടെ പുകയില്ലാതെ, ഹോണടി ശബ്ദമില്ലാതെ, സ്വസ്ഥമായ ഇരിക്കുന്നതിന് കൈനകരി പോലെ വേറൊരു കര കേരളത്തിലില്ല.നല്ല ശുദ്ധമായ കള്ള് കുടിക്കുന്നതിനും.’പുള്ളിപ്പുലി
വാഴ്ത്തപ്പെട്ട ചാവറ കുര്യാക്കോസ് ഏലിയാസ് അച്ചൻ ജനിച്ചതു കൈനകരിയിലാണ്.ചാവറ ബോട്ടു ജെട്ടിയുടെ അടുത്താണ് വിശുദ്ധന്റെ ജന്മഗൃഹം. 225 വർഷം പഴക്കമുള്ള മനോഹരമായ വീട് ഇപ്പോൾ തീർഥാടന കേന്ദ്രമാണ്. തടിയിൽ നിർമിച്ച ചുമരുകളും മനോഹരമായ മേൽക്കൂരയും അക്കാലത്തെ സാധാരണക്കാരുടെ ജീവിതം വ്യക്തമാക്കുന്നു. വീടിന് മാറ്റമൊന്നും വരുത്താതെ തൊട്ടടുത്ത് ഒരു ആരാധനാലയം നിർമിച്ചിട്ടുണ്ട്.
കുട്ടനാടിന്റെ കിഴക്കു ഭാഗത്താണ് കൈനകരി. പമ്പയാറിന്റെ ജലസമൃദ്ധിയാണ് കൈനകരിയെ ചെറു ദ്വീപാക്കി മാറ്റിയത്.ആറ്റിൻകരയിൽ നാലഞ്ചു ബോട്ട് ജെട്ടികളുണ്ട്. ആളു തികയുമ്പോൾ അക്കരയ്ക്കും ഇക്കരയ്ക്കും സർവീസ് നടത്തുന്ന ബോട്ടിൽ കയറി കൈനകരിയിലേക്കുള്ള യാത്ര ജീവിതത്തിൽ ഒരിക്കലെങ്കിലും നിർബന്ധമായും ആസ്വദിക്കണം.
എന്നുകരുതി ഇവിടെ പാലമില്ലെന്നല്ല കേട്ടോ. കൈനകരിയിൽ പമ്പയാറിനു കുറുകെയൊരു പാലമുണ്ട്. നോക്കുകുത്തിയായി മാറിയ മുണ്ടയ്ക്കൽ പാലം! പാലം കാണാൻ നല്ല ചന്തമുണ്ട്.ചന്തം മാത്രമേയുള്ളു.36 കോടി മുടക്കി നിർമിച്ച പാലം കൊണ്ട് ഒരു പ്രയോജനവും നാട്ടുകാർക്കില്ല. പമ്പയാറിൻ്റെ ഇരുകരകളെയും ബന്ധിപ്പിച്ച് പാലം പണി തീർന്നിട്ട് എട്ടു വർഷമായി.പാലത്തിൻ്റെ കിഴക്കുഭാഗത്ത് സമീപന പാതയ്ക്ക് സ്ഥലമെടുക്കാതെയാണ് പാലം നിർമിച്ചത്.പാലത്തിൻ്റെ വശത്തുള്ള വീടിൻ്റെ മുന്നിലൂടെ ചില ഇരുചക്ര വാഹനങ്ങൾ പാലത്തിലേക്ക് കയറ്റാനാകും.പാലം കൊണ്ട് പക്ഷെ പ്രയോജനമില്ലെന്നും പറയരുത്.വെള്ളപ്പൊക്കക്കാലത്ത് നാട്ടുകാർക്ക് കന്നുകാലികളെ കെട്ടാനും വാഹനം പാർക്ക് ചെയ്യാനും പറ്റുന്നുണ്ട്!
