ന്യൂഡല്‍ഹി: രാജ്യത്ത് സ്‌കൂളില്‍ പഠിക്കാനാകാത്ത പന്ത്രണ്ട് ലക്ഷത്തിലധികം കുട്ടികളുണ്ടെന്ന് കേന്ദ്ര സര്‍ക്കാര്‍ പാര്‍ലമെന്റില്‍. സി.പി.എം എം.പി എ.എ. റഹീമിന്റെ ചോദ്യത്തിന് രാജ്യസഭയില്‍ വിദ്യാഭ്യാസ മന്ത്രാലയം നല്‍കിയ മറുപടിയിലാണ് ഈ വെളിപ്പെടുത്തൽ രാജ്യത്താകെ, പ്രാഥമിക തലത്തില്‍ 9,30,531 കുട്ടികളും സെക്കന്‍ഡറി തലത്തില്‍ 3,22,488 വിദ്യാര്‍ത്ഥികളും സ്‌കൂളിന് പുറത്താണെന്ന് കണക്കുകള്‍ വ്യക്തമാക്കുന്നു. ഏറ്റവും കൂടുതല്‍ സ്‌കൂളിന് പുറത്തുള്ള കുട്ടികളുള്ള സംസ്ഥാനം ഉത്തര്‍പ്രദേശാണ്. രണ്ടാം സ്ഥാനം ഗുജറാത്തിനുമാണ്.
സ്‌കൂളില്‍ ചേരാതിരിക്കുകയോ, പാതി വഴിയില്‍ സ്‌കൂള്‍ ഉപേക്ഷിച്ചു പോയതോ ആയ കുട്ടികളുടെ കഴിഞ്ഞ രണ്ട് വര്‍ഷത്തെ കണക്കാണിത്. ഉത്തര്‍പ്രദേശില്‍ പ്രാഥമിക തലത്തില്‍ സ്‌കൂളില്‍ പോകാത്തത് 3,96,655 കുട്ടികളാണ്. ഗുജറത്തിലത് പ്രാഥമിക തലത്തില്‍ 1,068,55 കുട്ടികളും സെക്കന്‍ഡറി തലത്തില്‍ 36,522 സ്‌കൂളിന് പുറത്താണ്.
ബി.ജെ.പി സര്‍ക്കാര്‍ കൊണ്ടുവരുന്ന ദേശീയ വിദ്യാഭ്യാസ നയം തികച്ചും വിപരീത ഫലമായിരിക്കും ഉണ്ടാക്കുക. ഇത് പൂര്‍ണമായി നടപ്പിലാക്കുന്നത് വിദൂര പ്രദേശങ്ങളിലെ നിരവധി സ്‌കൂളുകള്‍ അടച്ചുപൂട്ടുന്നതിലേക്ക് നയിക്കുകയും സ്‌കൂളിന് പുറത്തുള്ള കുട്ടികളുടെ എണ്ണം വര്‍ധിപ്പിക്കുകയും ചെയ്യും. കേന്ദ്രസര്‍ക്കാര്‍ എന്‍ഇപി പിന്‍വലിക്കണമെന്നും കൂടുതല്‍ പുരോഗമനപരമായ വിദ്യാഭ്യാസ നയം രൂപീകരിക്കണം – എ.എ. റഹീം ആവശ്യപ്പെട്ടു
