പത്തനംതിട്ട: സീതത്തോട് കോട്ടണ്‍പാറയില്‍ തൊഴിലാളികളെകടുവ ആക്രമിച്ചു. ആങ്ങമൂഴി സ്വദേശി അനുകുമാറിനാണ് കടുവയുടെ ആക്രമണത്തില്‍ പരുക്കേറ്റത്. ഇയാളുടെ കാലിനും അടിവയറിനും സാരമായി പരുക്കേറ്റു.
സ്ത്രീകളും പുരുഷന്മാരുമടങ്ങുന്ന പതിനെട്ട് പേരുടെ സംഘമാണ് ആങ്ങമൂഴിയില്‍ ശബരിഗിരി പള്ളം വൈദ്യുതി ലൈനിനു താഴെ കാടുവെട്ടാന്‍ പോയത്. ഇതിനിടെ കടുവ അനുകുമാറിനെ ആക്രമിക്കുകയായിരുന്നു. മൂന്നുതവണയാണ് അനുകുമാറിനെ കടുവ ആക്രമിച്ചത്. ഇയാളുടെ നിലവിളി കേട്ട് ഒപ്പമുണ്ടായിരുന്നവര്‍ ചിതറിയോടി. കയ്യിലുണ്ടായിരുന്ന പുല്ലുവെട്ടിയന്ത്രമാണ് അനുകുമാറിന് രക്ഷയായത്. കടുവ ഇയാളെ കടിച്ചുവലിച്ച് കുറച്ചുദൂരം പോയിരുന്നു. പിന്നാലെ ഒപ്പമുണ്ടായിരുന്നവര്‍ ഓടിയെത്തി ബഹളംവച്ചതോടെ കടുവ ഓടിമറഞ്ഞു.
കാലിനു സാരമായി പരുക്കേറ്റ അനുകുമാറിനെ സീതത്തോട് പ്രാഥമികാരോഗ്യകേന്ദ്രത്തില്‍ പ്രാഥമിക ചികില്‍സയ്ക്കുശേഷം പത്തനംതിട്ട ജനറല്‍ ആശുപത്രിയില്‍ പ്രവേശിപ്പിച്ചു.
