പാലക്കാട്: ട്രെയിന്‍ ഇടിച്ച് കാട്ടാന ചരിഞ്ഞു. വാളയാര്‍ വാധ്യാര്‍ ചള്ളയിലാണ് സംഭവം. 20 വയസുള്ള പിടിയാനയാണ് ചരിഞ്ഞത്. പുലര്‍ച്ചെ 3.15നുള്ള കന്യാകുമാരിയില്‍ നിന്ന് അസമിലേക്ക് പോകുകയായിരുന്ന വിവേക് എക്സ്പ്രസ് ആണ് ആനയെ ഇടിച്ചത്. ട്രെയിന്‍ ഗതാഗതം തടസപ്പെട്ടിട്ടില്ലെങ്കിലും കാട്ടാനക്കൂട്ടം സംഭവ സ്ഥലത്ത് നിന്നും മാറിയിട്ടില്ല. ഒരു കുട്ടിയാനയ്ക്കും പരുക്കേറ്റതായി വിവരമുണ്ട്.
കഞ്ചിക്കോടിന് സമീപം കൊട്ടാമുട്ടി ഭാഗത്തെ ബി ലൈനിലൂടെ പോയ ആനയെയാണ് ട്രെയിന്‍ ഇടിച്ചത്.
റെയില്‍വേ ഉദ്യേഗസ്ഥരും വനം വകുപ്പ് സംഘവും സ്ഥലത്തെത്തി. ആനയെ പോസ്റ്റ്മോര്‍ട്ടത്തിനുശേഷം ഇവിടെ തന്നെ സംസ്‌കരിക്കാനാണു തീരുമാനം.
