പാലക്കാട്: പട്ടാമ്പി എസ്‌ഐക്ക് വെട്ടേറ്റു. പട്ടാമ്പി ടൗണില്‍ പട്രോളിങ്ങിനിടെയാണ് എസ്‌ഐ സുഭാഷ് മോഹന് വെട്ടേറ്റത്. മടാള്‍ മുജീബ് എന്നറിയപ്പെടുന്ന മുജീബാണ് എസ്‌ഐയെ വെട്ടിയത്. മഞ്ഞളുങ്ങള്‍ സ്വദേശിയായ മുജീബ് ലഹരിക്കടിമയാണ്. മുജീബ് ഇരുന്നിരുന്ന ഭാഗത്ത് കൂടെ നടക്കുകയായിരുന്ന എസ്‌ഐയെ യാതൊരു പ്രകോപനവും ഇല്ലാതെ ആക്രോശിക്കുകയും വടിവാള്‍ കൊണ്ട് വീശുകയുമായിരുന്നുവെന്നാണ് ദൃക്‌സാക്ഷികളുടെ മൊഴി. എസ് ഐയുടെ കാല്‍മുട്ടിനാണ് വെട്ടേറ്റത്. നാട്ടുകാര്‍ ഓടികൂടിയതോടെ മുജീബ് സമീപത്തെ ഇടവഴിയിലൂടെ ഓടിരക്ഷപ്പെടുകയായിരുന്നു. പൊലീസ് നടത്തിയ തിരച്ചിലിനൊടുവില്‍ വൈകീട്ട് ആറുമണിയോടെ പ്രതിയെ പിടികൂടി.
