വിളഞ്ഞ്, ഇലയും തണ്ടും വാടി ഉണങ്ങിയ ചെടികളിൽ നിന്നാണ് വിത്തുചേന തയ്യാറാക്കുന്നത്. ചേനയുടെ തണ്ട് നിന്ന ഭാഗത്തെ ശീർഷമായി കരുതി എല്ലാ വശങ്ങളിലേക്കും ഒരു ചാൺ നീളമുള്ള ത്രികോണാകൃതിയിൽ മുറിച്ച കഷണമാണ് നടീൽ വസ്തു. ചെറിയ മുഴുച്ചേനയും ചേനവിത്തും ഉപയോഗിക്കാം.

ഒരു നല്ല ചേനയിൽ നിന്ന് 750ഗ്രാം മുതൽ ഒരു കിലോ വരെയുള്ള കഷണങ്ങൾ ആക്കുന്നു.വരികൾ തമ്മിലും നിരകൾ തമ്മിലും മുക്കാൽ മീറ്ററെങ്കിലും അകലം കൊടുത്തു വേണം ചേന നടാൻ കുഴികൾ തയ്യാറാക്കാൻ. 60 സെന്റിമീറ്റർ സമചതുരവും 50 സെന്റിമീറ്റർ ആഴവുമുള്ള കുഴികളാണ് എടുക്കേണ്ടത്. കുഴിയൊന്നിന് രണ്ടു മൂന്നു കിലോ ജൈവവളം ചേർക്കാം.

ചേനക്കുഴികളിൽ കരിയിലയിട്ട് കത്തിച്ചതിനുശേഷം അതിലാണ് മുമ്പ് ജൈവവളം ചേർത്തിരുന്നത്്. അതിനുശേഷം മേൽമണ്ണിട്ട് കുഴിമൂടണം. ഇതിനുപുറമേ എല്ല് പൊടിയും ചേർക്കാവുന്നതാണ്.

നട്ടതിന് ശേഷം കുഴികൾക്കു മീതെ കരിയിലയോ പച്ചിലയോ ചേർത്ത് പുതയിട്ടു കൊടുക്കണം ഒരു മാസം കൊണ്ട് ചേനയുടെ മുളപൊട്ടും. അപ്പോൾ ചേനക്കുഴിക്കരിലൂടെ അല്പം കല്ലുപ്പ് തൂവി നനച്ചുകൊടുക്കണം. വേര് പെട്ടെന്ന് വളർന്നുവരാനാണ് അങ്ങനെ ചെയ്യുന്നത്. വളർന്നുവരുന്ന തൂമ്പിൽ ഒന്ന് മാത്രം നിലനിർത്തുക. ഒരു ചുവട്ടിൽ നിന്ന് ഒന്നിലധികം കിളിർപ്പ് വരുന്നുണ്ടെങ്കിൽ നല്ല പുഷ്ടിയുള്ള ഒന്നുമാത്രം നിർത്തി ബാക്കിയുള്ളവ മുറിച്ചു കളയണം.നല്ല നീർവാർച്ചയുള്ള മണ്ണാണ് ചേന കൃഷിക്ക് അനുയോജ്യം. 25 മുതൽ 35 ഡിഗ്രി വരെ ചൂടുള്ള പ്രദേശങ്ങളാണ് ചേന കൃഷിക്ക് അനുയോജ്യം. വിത്ത് നട്ട് 6-7 മാസം കൊണ്ട് ചേന വിളവെടുക്കാനാകും.