അത്താഴത്തിനുമുണ്ട് ചില കണക്കുകൾ;അറിഞ്ഞു കഴിച്ചാൽ ആരോഗ്യത്തിന് നല്ലത്

വയറുനിറയെ അത്താഴം കഴിക്കുന്ന ശീലമുള്ളവരാണ് പൊതുവെ മലയാളികള്‍. എന്നാല്‍,അത്താഴത്തിന് അത്തരമൊരു ഭക്ഷണരീതി ഒരു തരത്തിലും ആരോഗ്യത്തിനു ഗുണം ചെയ്യില്ല. മാത്രമല്ല വലിയ ദോഷമാകുകയും ചെയ്യും.അത്താഴം എപ്പോഴും ലഘുവായിരിക്കണം.അത്താഴം കഴിക്കുന്ന സമയവും വളരെ പ്രധാനപ്പെട്ടതാണ്.രാത്രി ഏഴിനു മുന്‍പ് അത്താഴം കഴിക്കുന്നതാണ് ആരോഗ്യകരമായ ഭക്ഷണരീതി.രാത്രി വൈകി അത്താഴം കഴിക്കുന്നത് തടി കൂട്ടുകയും വയറുചാടാന്‍ കാരണമാകുകയും ചെയ്യും.

വൈകിയ വേളകളില്‍ അത്താഴം കഴിക്കുന്നത് സ്വസ്ഥമായ ഉറക്കത്തെ കാര്യമായി ബാധിച്ചേക്കാം. ഭക്ഷണം ആഗിരണം ചെയ്യാന്‍ ആമാശയം ആസിഡ് പുറപ്പെടുവിക്കുന്നു, ഈ ആസിഡ് കിടക്കുമ്പോള്‍ ശരീരങ്ങളില്‍ വ്യത്യസ്തമായി പ്രതികരിക്കും. ചിലര്‍ക്ക് ഇത് ഉറക്കമില്ലായ്മ, അസിഡിറ്റി, നെഞ്ചെരിച്ചില്‍ എന്നിവയ്ക്ക് കാരണമായേക്കാം. ചിലര്‍ക്ക് ഇത് പതിവായി വയറുവേദനയ്ക്കും മലബന്ധത്തിനും കാരണമാകും.

അത്താഴമുണ്ടാൽ അരക്കാതം നടക്കണമെന്നാണ് പറയാറുള്ളത്.അത്താഴം കഴിച്ചയുടന്‍ പോയി കിടന്നുറങ്ങരുത്.അല്‍പ്പമൊന്ന് നടക്കുന്നത് നല്ലതാണ്.രാത്രി നേരത്തെ അത്താഴം കഴിച്ച ശേഷം ഉറങ്ങാന്‍ നേരം വൈകുകയാണെങ്കില്‍ ചിലപ്പോള്‍ വീണ്ടും വിശക്കാന്‍ സാധ്യതയുണ്ട്.അങ്ങനെയുള്ള സമയത്ത് നിങ്ങള്‍ക്ക് കുറഞ്ഞ അളവില്‍ മാത്രം കലോറി, പ്രോട്ടീന്‍, കാര്‍ബോഹൈഡ്രേറ്റ് എന്നിവ അടങ്ങിയ, ലഘു ഭക്ഷണങ്ങള്‍ കഴിക്കാം.

പ്രോട്ടീനും ഫൈബറും അടങ്ങിയ ഭക്ഷമാണ് രാത്രി കഴിക്കേണ്ടത്.രാത്രി ചോറ് കഴിക്കുന്നത് അത്ര നല്ലതല്ല.കൊഴുപ്പ്, പഞ്ചസാര, കാര്‍ബോഹൈഡ്രേറ്റ് എന്നിവയുടെ അളവ് കുറഞ്ഞിരിക്കുന്ന ഭക്ഷണമാണ് അത്താഴത്തിന് അനുയോജ്യം.സൂപ്പ്, റൊട്ടി, പച്ചക്കറി എന്നിവ അത്താഴത്തില്‍ ഉള്‍പ്പെടുത്താം.

 

സോഡയും മറ്റ് മധുരപാനീയങ്ങളും അധിക കലോറി ചേർത്തവയാണെന്നുള്ള കാര്യം മറക്കരുത്.വെള്ളവും പാലും തന്നെയാണ് മികച്ച പാനീയങ്ങൾ.മദ്യവും ബിയറും ഒഴിവാക്കേണ്ടതു തന്നെ.

 

നല്ല ജീവിതശൈലി നിലനിർത്തുന്നതിനുള്ള ഏറ്റവും പ്രധാന കാര്യം ശരിയായ ഭക്ഷണം, വ്യായാമം എന്നിവ മാത്രമല്ല ശരിയായ സമയത്ത് ഭക്ഷണം കഴിക്കുക എന്നതും കൂടിയാണ്. അതെ, നിങ്ങൾ കഴിക്കുന്ന ഭക്ഷണമാണ് നിങ്ങളുടെ ആരോഗ്യത്തെ നിർണ്ണയിക്കുന്നത്. എന്നാൽ ഉചിതമായ സമയത്ത് കൃത്യമായ ഇടവേളകളിൽ ഭക്ഷണം കഴിക്കുന്നത് ശരീരഭാരം കുറയ്ക്കാൻ മാത്രമല്ല, ഹൃദയ രോഗങ്ങളെ അകറ്റി നിർത്താനും സഹായിക്കുന്നു.