പിണറായി വിജയന്‍ സര്‍ക്കാരിന്റെ അവസാന ബഡ്ജറ്റ് ഇന്ന് രാവിലെ 9 മണിക്ക് മന്ത്രി തോമസ് ഐസക്ക് നിയമസഭയില്‍ അവതരിപ്പിക്കും. തിരഞ്ഞെടുപ്പിന് ആഴ്ചകള്‍ മാത്രം അവശേഷിക്കേ ഇന്നത്തെ ബഡ്ജറ്റ് സര്‍ക്കാരിന് നിര്‍ണായകമാവും. സര്‍ക്കാരിനെ സംബന്ധിച്ചിടത്തോളം ഈയവസരം ശരിയായി ഉപയോഗിക്കേണ്ടത് അത്യാവശ്യമാണ്. ഹൃസ്വകാലയളവില്‍ നടപ്പാക്കാവുന്ന പദ്ധികള്‍ക്കായിരിക്കും മന്ത്രി മുന്‍തൂക്കം നല്‍കുക എന്നാണ് റിപ്പോര്‍ട്ട്. ഇലക്ഷന്‍ ലക്ഷ്യമിട്ട് പുതിയ പ്രഖ്യാപനങ്ങളും കഴിഞ്ഞ നാലര വര്‍ഷത്തെ സര്‍ക്കാരിന്റെ വികസന പ്രവര്‍ത്തനങ്ങളും നേട്ടങ്ങളും ചൂണ്ടിക്കാട്ടിയാവും മന്ത്രി ബഡ്ജറ്റ് അവതരിപ്പിക്കുക. ക്ഷേമ പെന്‍ഷന്‍ വര്‍ധന, തേങ്ങയുടേയും നെല്ലിന്റെയും റബ്ബറിന്റെയും സംഭരണ വില വര്‍ധന, കൃഷി മേഖലയിലേക്കുള്ള പാക്കേജുകള്‍, പ്രവാസികള്‍ക്കായുള്ള പദ്ധതികള്‍ തുടങ്ങിയവ ബഡ്ജറ്റിലുള്‍പ്പെടുമെന്നാണ് പ്രതീക്ഷ.
