‘പെണ്സുഹൃത്ത് വീട്ടില് വിളിച്ചുവരുത്തി വിഷം നല്കി’യെന്ന് മൊഴി; കോതമംഗലത്തെ യുവാവിന്റെ മരണത്തില് യുവതി കസ്റ്റഡിയില്
കോതമംഗലം: കോതമംഗലത്ത് യുവാവ് വിഷം ഉള്ളില്ച്ചെന്ന് മരിച്ച സംഭവത്തില് പെണ്സുഹൃത്ത് പൊലീസ് കസ്റ്റഡിയില്. മാതിരപ്പള്ളി മേലേത്തുമാലില് അലിയാരുടെ മകന് അന്സില് (38) ആണ് മരിച്ചത്. വ്യാഴാഴ്ച രാത്രി എട്ടരയോടെ കൊച്ചിയിലെ സ്വകാര്യ ആശുപത്രിയില് ചികിത്സയില് കഴിയുമ്പോഴായിരുന്നു മരണം.
പെണ്സുഹൃത്ത് വീട്ടില് വിളിച്ചുവരുത്തി തനിക്ക് വിഷം നല്കിയെന്ന് ആശുപത്രിയിലേക്ക് കൊണ്ടുപോകുന്നതിനിടെ ആംബുലന്സില്വച്ച് അന്സില് സുഹൃത്തിനോട് പറഞ്ഞിരുന്നു. സുഹൃത്ത് ഇക്കാര്യം പൊലീസിനെ അറിയിച്ചു. ഇതിന് പിന്നാലെയാണ് ചേലാട് സ്വദേശിനിയായ മുപ്പതുകാരിയെ കോതമംഗലം പൊലീസ് കസ്റ്റഡിയിലെടുത്തത്.
മാലിപ്പാറയിലുള്ള പെണ്സുഹൃത്തിന്റെ വീട്ടില്വച്ചാണ് അന്സിലിന്റെ ഉള്ളില് വിഷം ചെന്നത്. വ്യാഴാഴ്ച പുലര്ച്ചെ രണ്ടരയോടെ ആയിരുന്നു ഇത്. തുടര്ന്ന് അന്സിലും പെണ്സുഹൃത്തും ഇക്കാര്യം പൊലീസില് അറിയിച്ചെന്നാണ് വിവരം. പൊലീസെത്തി ആദ്യം കോതമംഗലം താലൂക്ക് ആശുപത്രിയില് പ്രവേശിപ്പിച്ചു. പിന്നീട് വിദഗ്ധ ചികിത്സയ്ക്കായി കൊച്ചിയിലെ സ്വകാര്യ ആശുപത്രിയിലേക്ക് കൊണ്ടുപോവുകയായിരുന്നു.
വ്യാഴാഴ്ച പുലര്ച്ചെ 12.20 വരെ അന്സില് മൂവാറ്റുപുഴയ്ക്കടുത്തുള്ള പേഴയ്ക്കാപ്പള്ളിയിലുണ്ടായിരുന്നു. പിന്നീടാണ് പെണ്സുഹൃത്തിന്റെ വീട്ടിലെത്തിയത്. ക്രിമിനല് പശ്ചാത്തലമുള്ള അന്സില് വിവാഹിതനാണ്. മക്കളുമുണ്ട്. അന്സിലിന്റെ ബന്ധു കൂടിയാണ് പെണ്സുഹൃത്ത്. ഇവരുമായി ഏറെക്കാലമായി അന്സിലിന് അടുപ്പമുണ്ടായിരുന്നു. ഇടയ്ക്കിടെ പിണക്കങ്ങളുണ്ടാകുമെങ്കിലും അവ പരിഹരിക്കപ്പെട്ടിരുന്നുവെന്നുമാണ് വിവരം.
അതിനിടെ, അന്സിലിന്റെ ഭാഗത്തുനിന്ന് യുവതിക്ക് ചില ദുരനുഭവങ്ങളുണ്ടാകുകയും തുടര്ന്ന് ഇയാളെ കരുതിക്കൂട്ടി വിളിച്ചുവരുത്തി വിഷം കലര്ത്തി നല്കുകയായിരുന്നുവെന്നുമാണ് സൂചന. അന്സിലിന്റെ മൃതദേഹം കളമശേരി മെഡിക്കല് കോളജില് പോസ്റ്റ്മോര്ട്ടം ചെയ്യും.
