മലബാർ സിമൻറ്സ് അഴിമതിയെ എതിർത്ത ശശീന്ദ്രനും മക്കളും  കൊല്ലപ്പെട്ടിട്ട് 13 വർഷം 

2011 ജനുവരി 24-നാണ് ശശീന്ദ്രനും മക്കളും മരിച്ചത്.13 വർഷം കഴിഞ്ഞിട്ടും പൂർണ്ണ നീതി ലഭിക്കാതെ കഴിയുകയാണ് ശശീന്ദ്രന്റെ കുടുംബം.

മലബാർ സിമന്റ്സ് അഴിമതികളാണ് ശശീന്ദ്രന്റെയും മക്കളുടെയും ദുരൂഹ മരണത്തിൽ കലാശിച്ചിട്ടുള്ളതിനാൽ അതിലേക്കു  നയിച്ച അഴിമതികൾ കൂടി സി.ബി. ഐ അന്വേഷിക്കണമെന്ന് ആവശ്യപ്പെട്ട് കുടുംബവും ആക്ഷൻ കൗൺസിലും 2011ലും2015 ലും  കൊടുത്ത

 കേസ് ഫയലുകൾ കോടതിയിൽ നിന്നു പോലും  ബോധപൂർവ്വം മോഷ്ടിച്ചു കടത്താൻ ശ്രമമുണ്ടായി.

മലബാര്‍ സിമന്റ്സ് അഴിമതിയുമായി ബന്ധപ്പെട്ട് 2010 ഡിസംബറില്‍ രജിസ്റ്റര്‍ ചെയ്ത നാല് കേസുകളില്‍ ശശീന്ദ്രന്‍ സാക്ഷിയായിരുന്നു. ആ കേസുകളില്‍പ്പോലും വിചാരണ ആരംഭിച്ചില്ല. പിന്നാലെ ശശീന്ദ്രന്റെ ഭാര്യ ടീനയും മരിച്ചു .ഇതിലെദുരൂഹതയും നിലനില്‍ക്കുകയാണ്. എറണാകുളത്ത് സ്വകാര്യ സ്ഥാപനത്തില്‍ ജീവനക്കാരിയായിരുന്ന ടീന പനി മൂര്‍ച്ഛിച്ചു ക്വാര്‍ട്ടേഴ്സില്‍ കുഴഞ്ഞുവീണപ്പോള്‍ എറണാകുളത്തെ ആശുപത്രിയിലല്ല കോയമ്പത്തൂരിലെ ആശുപത്രിയിലാണ് എത്തിച്ചത്. മലബാര്‍ സിമന്റ്സ് ജീവനക്കാരനും മറ്റൊരു സാക്ഷിയുമായിരുന്ന സതീന്ദ്രകുമാര്‍ നേരത്തെ കോയമ്പത്തൂര്‍ ഉക്കടം ബസ് സ്റ്റാന്റില്‍ വച്ച് ബസ് ഇടിച്ചു മരിച്ചു. സതീന്ദ്രകുമാറിനു ചില വിവരങ്ങള്‍ കൈമാറിയ മറ്റൊരാള്‍ കാറിനുള്ളില്‍ കൈഞരമ്പ് മുറിച്ചു മരിച്ച നിലയില്‍ കാണപ്പെട്ടിരുന്നു. ശശീന്ദ്രനും മക്കളും മരിച്ചതോടുകൂടി അബോധാവസ്ഥയിലായ ശശീന്ദ്രന്റെ അമ്മയും ഇന്നില്ല. 92 വയസ്സായ അച്ഛന്‍ വേലായുധന്‍ മാസ്റ്ററും ഇതിനകം മരണംപൂകി.

ശശീന്ദ്രനും മക്കളും മരിക്കുമ്പോള്‍ വി.എസ്. അച്യുതാനന്ദന്‍ സര്‍ക്കാരിന്റെ കാലാവധി തീരാന്‍ നാലു മാസം മാത്രമാണുണ്ടായിരുന്നത്. മരണത്തിലേക്ക് എത്തിച്ച അഴിമതികളും അന്വേഷിക്കണം എന്ന് ആ സമയത്തുതന്നെ ബന്ധുക്കളും ആക്ഷന്‍ കൗണ്‍സിലും ആവശ്യപ്പെട്ടിരുന്നു. പിന്നീട് വന്ന യു.ഡി.എഫ് സര്‍ക്കാര്‍ പരസ്പരവിരുദ്ധമായ നിലപാടാണ് സ്വീകരിച്ചത്. എല്ലാ കാര്യങ്ങളും അന്വേഷണ പരിധിയില്‍ വരും എന്ന് മുഖ്യമന്ത്രി ഉമ്മന്‍ ചാണ്ടി ഉറപ്പുകൊടുത്തു; എന്നാല്‍, ഹൈക്കോടതിയില്‍ സര്‍ക്കാര്‍ നല്‍കിയ സത്യവാങ്മൂലം നേരെ വിപരീതമായിരുന്നു.

ടീനയും വേലായുധന്‍ മാസ്റ്ററും ഹൈക്കോടതിയില്‍ സമര്‍പ്പിച്ച ഹര്‍ജി പരിഗണിച്ച് ജസ്റ്റിസ് തോമസ് പി. ജോസഫാണ് ശശീന്ദ്രന്റേയും മക്കളുടേയും മരണം സി.ബി.ഐ അന്വേഷിക്കാന്‍ ഉത്തരവിട്ടത്. മരണത്തെക്കുറിച്ചും ശശീന്ദ്രന്‍ സാക്ഷിയായ അഴിമതിക്കേസുകളും കൂടി സി.ബി.ഐ അന്വേഷിക്കണം എന്നു കോടതി നിര്‍ദ്ദേശിച്ചിരുന്നു. എന്നാല്‍, വിധിയുടെ അടിസ്ഥാനത്തില്‍ സര്‍ക്കാര്‍ പുറപ്പെടുവിച്ച സി.ബി.ഐ അന്വേഷണ വിജ്ഞാപനം അത്തരത്തിലായിരുന്നില്ല.

 

അഴിമതികൂടി അന്വേഷണത്തില്‍ ഉള്‍പ്പെടുത്തണം എന്നാവശ്യപ്പെട്ട് വേലായുധന്‍ മാസ്റ്ററും ജോയി കൈതാരത്തും 2011 സെപ്റ്റംബറില്‍ ഹര്‍ജി നല്‍കി. ഇക്കാര്യത്തില്‍ കോടതി അഭിപ്രായം ചോദിച്ചപ്പോള്‍ അനുകൂലമായാണ് അന്നത്തെ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ ഫയലില്‍ എഴുതിയത്.ഈ സുപ്രധാന ഫയലാണ് 2018-ല്‍ ഹൈക്കോടതിയില്‍നിന്നു കാണാതായതും അതു വന്‍ വിവാദമായതും. ഫയല്‍ തിരിച്ചുകിട്ടിയെങ്കിലും ഹര്‍ജിക്കാരുടെ ആവശ്യം കോടതി അപ്പോള്‍ അംഗീകരിച്ചില്ല. സി.ബി.ഐ അന്വേഷണത്തില്‍ അഴിമതി എന്നൊരു വാക്കുപോലും ഉണ്ടായുമില്ല. അഴിമതി കേസ് കൂടി അന്വേഷിക്കണം എന്ന് ആവശ്യപ്പെട്ട് 2015 മെയ് 30-ന് വി.എസ്. അച്യുതാനന്ദന്‍ സി.ബി.ഐക്ക് എഴുതി. ഈ കാര്യത്തില്‍ ഹൈക്കോടതിയോ സംസ്ഥാന സര്‍ക്കാരോ ശുപാര്‍ശ ചെയ്യണം എന്നു വ്യക്തമാക്കി ജൂലൈ 29-ന് സി.ബി.ഐ മറുപടി നല്‍കി. ഇതിന്റെ കൂടി അടിസ്ഥാനത്തില്‍ വേഗം തീര്‍പ്പാക്കാന്‍ ഹൈക്കോടതിയില്‍ ഹര്‍ജി എത്തിയപ്പോഴാണ് ഫയല്‍ കാണാതായ വിവരം പുറത്തു വന്നത്.

 

മലബാർ സിമന്റ്സ് കമ്പനി സെക്രട്ടറിയായിരുന്ന ശശീന്ദ്രനെയും മക്കളെയും കൊന്നതാണെന്ന ആരോപണത്തിന് പതിറ്റാണ്ടിന്റെ കഴക്കമുണ്ട്. മലബാർ സിമന്റ്സ് കമ്പനി സെക്രട്ടറിയായിരുന്ന ശശീന്ദ്രനെയും 2011 രണ്ട് മക്കളെയും ജനുവരി 24ന് കഞ്ചിക്കോട്ടെ വീട്ടിൽ മരിച്ച നിലയിൽ കണ്ടെത്തുകയായിരുന്നു. മലബാർ സിമന്റ്സിലെ അഴിമതികളുടെ ബലിയാടാവുകയായിരുന്നു ശശീന്ദ്രനെന്നായിരുന്നു അന്ന് പുറത്തു വന്ന വിവരങ്ങൾ. ശശീന്ദ്രനിലൂടെ വിവരങ്ങൾ പുറത്താകുമെന്ന് ഭയന്നാണ് ഇയാളെ കൊലപ്പെടുത്തിയതാകാമെന്ന് ആരോപണങ്ങൾ അടക്കം ശക്തമായിരുന്നു.

 

പാലക്കാട്ടെ വിവാദ വ്യവസായി ചാക്ക് രാധാകൃഷ്ണനിലേക്കാണ് അന്ന് സംശയം നീണ്ടത്. ഒടുവിൽ കേസിൽ ചാക്ക് രാധാകൃഷ്ണനെ അറസ്റ്റു ചെയ്‌തെങ്കിലും അന്വേഷണം എങ്ങുമെത്താതെ പോയി. ഏറ്റവും ഒടുവിൽ മലബാർ സിമന്റ്‌സിലെ മുൻ കമ്പനി സെക്രട്ടറി വി.ശശീന്ദ്രന്റെയും മക്കളുടെയും മരണം ആത്മഹത്യയാണെന്നു കുറ്റപത്രം നൽകിയ സിബിഐയെ കണക്കിനു വിമർശിച്ചു ഹൈക്കോടതിയും രംഗത്തുവന്നതോടെ തീർത്തും ദൂരുഹതകൾ നിറഞ്ഞ ആ കേസിലെ സത്യം ഇപ്പോഴും കാണാമറയത്താണ്.