കൊല്ലം: അച്ചൻകോവിൽ പാതയിൽ വളയത്ത് കുട്ടിയാന ചരിഞ്ഞു.
രണ്ട് വയസ് പ്രായം വരുന്ന പിടിയാനയാണ് ചരിഞ്ഞത്.
പാതയോരത്ത് തല കുമ്പിട്ട നിലയിലാണ് മൃതദേഹം കാണപ്പെട്ടത്. കുട്ടിയാനയുടെ ജഡത്തിന് സമീപം നിലയുറപ്പിച്ചിരിക്കുന്ന തള്ളയാന
ഇടയ്ക്കിടയ്ക്ക് അക്രമകാരി ആകുന്നു എന്ന് വനംവകുപ്പ് ഉദ്യോഗസ്ഥർ മുന്നറിയിപ്പ് നൽകിയതിനെ തുടർന്ന് പാതയിൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്.
പുനലൂർ അലിമുക്കിൽ നിന്ന് അച്ചൻകോവിലിലേക്കുള്ള റോഡിലാണ് ജഡം കണ്ടത്.
വനം വകുപ്പ് ഉദ്യോഗസ്ഥർ സ്ഥലത്തെത്തിയെങ്കിലും സമീപം നിലയുറപ്പിച്ചിട്ടുള്ള ആന കൂടുതൽ അപകടകാരി ആകാൻ സാധ്യത ഉള്ളതിനാലാണ് ഇവിടെ ഗതാഗത നിയന്ത്രണം ഏർപ്പെടുത്തിയിട്ടുള്ളത്.
വനം വകുപ്പ് ഉദ്യോഗസ്ഥരുടെ നിർദ്ദേശങ്ങൾ കർശനമായി പാലിച്ച് വേണം ഇതുവഴി വാഹനത്തിൽ യാത്ര ചെയ്യുവാൻ.അതേപോലെ സംഭവസ്ഥലത്തിന് 200 മീറ്റർ ചുറ്റളവിൽ വാഹനത്തിൽ നിന്നും പുറത്ത് ഇറങ്ങുന്നതിന് മൂന്ന് ദിവസത്തേക്ക് നിയന്ത്രണവും ഏർപ്പെടുത്തിയിട്ടുണ്ട്.
