നിഗൂഡമായി കാട്ടാനകളുടെ ജഡങ്ങള് പുഴയില് പതിവായി കണ്ടെത്തുന്നു ; സംഭവം മലയാറ്റൂര് വനമേഖലയില്, വിദഗ്ധ അന്വേഷണത്തിന് ഉത്തരവിട്ട് വനംവകുപ്പ്, റിപ്പോര്ട്ട് ഒരു മാസത്തിനുള്ളില് സമര്പ്പിക്കണം
തൃശുര്: പതിവായി കാട്ടരുവിയില് ആനകളുടെ ജഡങ്ങള് കണ്ടെത്തുന്ന സംഭവത്തില് അന്വേഷണം പ്രഖ്യാപിച്ച് വനം വകുപ്പ്. മലയാറ്റൂര് വനമേഖലയില് കാട്ടാനകളുടെ ജഡങ്ങള് പുഴയില് കണ്ടെത്തുന്നത് സ്ഥിരം സംഭവമായതോടെയാണ് അന്വേഷണം നടത്താനുള്ള തീരുമാനം വന്നിരിക്കുന്നത്. പതിനൊന്ന് അംഗ സമിതിക്കാണ് അന്വേഷണ ചുമതല. ചീഫ് ഫോറസ്റ്റ് കണ്സര്വേറ്റര് ഡി കെ കുമാര് ടീമിനെ നയിക്കും.
മലയാറ്റൂര് ഡി എഫ് ഒ, ഡോക്ടര് അരുണ് സക്കറിയയും ടീമിന്റെ ഭാഗമാണ്. ഒരു മാസത്തിനകം അന്വേഷണറിപ്പോര്ട്ട് സമര്പ്പിക്കാനാണ് ചീഫ് വൈല്ഡ് ലൈഫ് വാര്ഡന് പ്രമോദ് ജി കൃഷ്ണന്റെ നിര്ദേശം. നാളെ തന്നെ സമിതി അന്വേഷണം ആരംഭിക്കും എന്നാണ് വിവരം. ഒരേ പ്രദേശത്ത് ഇത്തരം സംഭവങ്ങള് ആവര്ത്തിക്കാനുള്ള കാരണങ്ങള് തേടും.
പോസ്റ്റുമോര്ട്ടം നടപടികളും റിപ്പോര്ട്ടുകളും പരിശോധിക്കും. സംശയാസ്പദമോ നിയമവിരുദ്ധമോ കുറ്റകരമോ ആയിട്ടുള്ള സംഭവങ്ങള്, വനം വകുപ്പിന്റെ ഇടപെടലുകള്, കൃത്യനിര്വ്വഹണത്തിലെ വീഴ്ചകള് തുടങ്ങിയ വിഷയങ്ങളാണ് അന്വേഷണ റിപ്പോര്ട്ടില് ഉള്പ്പെടുത്തേണ്ടത്.
