എഐ കാമറ; വി.ഡി. സതീശന്റെയും രമേശ് ചെന്നിത്തലയുടെയും ഹര്ജി ഹൈക്കോടതി തള്ളി; കരാറില് ദുരുദ്ദേശ്യമോ നിയമവിരുദ്ധതയോ അഴിമതിയോ ഉള്ളതായി തെളിവില്ല; തെളിവു ഹാജരാക്കാന് ഹര്ജിക്കാര്ക്കും കഴിഞ്ഞില്ലെന്ന് കോടതി
കൊച്ചി: സംസ്ഥാനത്ത് എഐ ക്യാമറകള് സ്ഥാപിച്ചതില് ക്രമക്കേട് ആരോപിച്ച് കോണ്ഗ്രസ് നേതാക്കള് നല്കിയ ഹര്ജി ഹൈക്കോടതി തള്ളി. എഐ ക്യാമറ അഴിമതിയില് ഹൈക്കോടതി മേല്നോട്ടത്തില് അന്വേഷണം ആവശ്യപ്പെട്ട് പ്രതിപക്ഷ നേതാവ് വി ഡി സതീശനും രമേശ് ചെന്നിത്തലയും നല്കിയ പൊതുതാല്പ്പര്യ ഹര്ജിയാണ് ഹൈക്കോടതി തള്ളിയത്.
ചീഫ് ജസ്റ്റിസ് നിതിന് ജാംദാര്, ജസ്റ്റിസ് ബസന്ത് ബാലാജി എന്നിവരടങ്ങിയ ഡിവിഷന് ബെഞ്ചാണ് വാദം കേട്ട ശേഷം ഹര്ജി തള്ളിയത്. കരാറില് അഴിമതി നേരിട്ട് വ്യക്തമാക്കുന്ന ഒരു തെളിവും ഹര്ജിക്കാര് നല്കിയിട്ടില്ലെന്ന നിരീക്ഷണത്തോടെയാണ് കോടതി കോണ്ഗ്രസ് നേതാക്കളുടെ ആവശ്യം തള്ളിയത്. ആരോപണങ്ങളില് വസ്തുതാപരമായ തെളിവുകളില്ലെന്ന് വ്യക്തമാക്കിയാണ് കോടതി നടപടി. കരാര് ഏറ്റെടുത്ത കമ്പനികള് ഉപകരാര് നല്കിയതും ഈ കമ്പനികളുടെ സാങ്കേതിക മികവിലടക്കം ചോദ്യങ്ങള് ഉയര്ത്തിയുമായിരുന്നു ഹര്ജി.
‘റിട്ട് ഹര്ജിയിലെ അവകാശവാദങ്ങളും എതിര്വാദങ്ങളും ഇരുഭാഗത്തെയും അഭിഭാഷകരുടെ വാദങ്ങളും വിശദമായി പരിശോധിച്ചതില്നിന്നും ക്യാമറ സ്ഥാപിക്കാന് നല്കിയ കോണ്ട്രാക്ടില് ഏതെങ്കിലും ദുരുദ്ദേശമോ നിയമവിരുദ്ധതയോ അഴിമതിയോ നടപടിചട്ടങ്ങളുടെ ലംഘനമോ ഉള്ളതിന്റെ എന്തെങ്കിലും തെളിവ് നല്കുന്നതിന് പരാതിക്കാര് പരാജയപ്പെട്ടു എന്നാണു ഞങ്ങളുടെ ബോധ്യം’ എന്ന് ചീഫ് ജസ്റ്റിസ് അടങ്ങുന്ന ഡിവിഷന് ബെഞ്ച് വ്യക്തമാക്കി.
ഗുരുതര ആരോപണങ്ങളായിരുന്നു കരാറുമായി ബന്ധപ്പെട്ട് പ്രതിപക്ഷം മുന്നോട്ടുവച്ചത്. കോടതി മേല്നോട്ടത്തില് അഴിമതിയെക്കുറിച്ച് അന്വേഷിക്കണമെന്ന് വി ഡി സതീശന് നല്കിയ ഹര്ജിയില് ആവശ്യപ്പെട്ടിരുന്നത്. എഐ ക്യാമറ ഉള്പ്പടെ നിയമപരമായ നടപടികളിലൂടെയല്ല കരാറുകളും ഉപകരാറുകളും നല്കിയതെന്നാണ് ഹര്ജിയിലെ ആരോപണം. പൊതുനന്മയെ കരുതിയാണ് ഹര്ജി നല്കിയത്.
എല്ലാ മാനദണ്ഡങ്ങളേയും മറികടന്നാണ് കരാര്. കണ്ണൂര് ആസ്ഥാനമാക്കിയുള്ള ചില കറക്ക് കമ്പനികളാണ് ഇതിന് പിന്നിലെന്നും പ്രതിപക്ഷ നേതാവ് പറഞ്ഞിരുന്നു. കെല്ട്രോണും എസ്ആര്ഐടിയും തമ്മില് ഉണ്ടാക്കിയ കരാറും മോട്ടര് വാഹന വകുപ്പ് കെല്ട്രോണുമായുണ്ടാക്കിയ കരാറും നിയമവിരുദ്ധമായതിനാല് റദ്ദാക്കണം എന്നിവയായിരുന്നു ഹര്ജിയിലെ ആവശ്യങ്ങള്. എന്നാല് സര്ക്കാര് നിലപാട് അംഗീകരിച്ച കോടതി ഹര്ജി തള്ളുകയായിരുന്നു. kerala-high-court/kerala-high-court-dismisses-writ-challenging-ai-camera-installation
