കുമ്പള :ബന്തിയോട് മുട്ടം ഗേറ്റിനു സമീപം ടിപ്പര്‍ ലോറി ബൈക്കിലിടിച്ച്‌ രണ്ട് വിദ്യാര്‍ഥികള്‍ മരിച്ചു. മംഗളൂരു ശ്രീനിവാസ കോളജിലെ ബിബിഎ രണ്ടാം വര്‍ഷ വിദ്യാര്‍ഥികളായ ഉപ്പള നയബസാര്‍ സ്വദേശി മിസ്ഹബ്(21), മഞ്ചേശ്വരം ബഡാജെ സ്വദേശി മുഹമ്മദ് ആമീന്‍ മഹറൂഫ്(20) എന്നിവരാണ് മരിച്ചത്.
ഇന്നലെ രാവിലെ പത്തോടെ ദേശീയപാത മുട്ടം ഗേറ്റില്‍ ഊരാളുങ്കല്‍ ലേബര്‍ കോണ്‍ട്രാക്‌ട് സൊസൈറ്റിയുടെ ടിപ്പര്‍ ലോറിയാണ് ഇവര്‍ സഞ്ചരിച്ച ബൈക്കില്‍ ഇടിച്ചത്. റോഡിലേക്ക് തെറിച്ചുവീണ് ഗുരുതരമായി പരിക്കേറ്റ ഇരുവരെയും ഉടന്‍ മംഗളൂരുവിലെ ആശുപത്രിയില്‍ പ്രവേശിപ്പിച്ചെങ്കിലും ഒരാള്‍ ഉച്ചയ്ക്കും മറ്റൊരാള്‍ രാത്രിയോടെയും മരണപ്പെട്ടു.
ഉച്ചയോടെ മിസ്ഹബും വൈകീട്ട് ഏഴോടെ മഹറൂഫിന്റെയും മരണം സ്ഥിരീകരിച്ചു.ബഡാജെ സ്വദേശി ഹനീഫ-ശമീമ ദമ്ബതികളുടെ മകനാണ് മഹറൂഫ്. സഹോദരങ്ങള്‍: സന, മഹ്ഷൂക്ക്. നയാബസാര്‍ നാട്ടക്കല്‍ ഹൗസിലെ അബ്ദുല്‍ കാദര്‍-ഫൗസിയ ദമ്ബതികളുടെ മകനാണ് മുഹമ്മദ് മിസ്ഹബ്. മുസ് ല, സഹോദരങ്ങള്‍: നദ, നൂഹ.
