റിയാദ്: ഒമാനില്‍ നിന്നു സന്ദര്‍ശന വിസയിലെത്തി റിയാദില്‍ കാണാതായ ന്യൂ മാഹി സ്വദേശിയായ യുവാവിനെ അല്‍ ഹസ ജയിലില്‍ കണ്ടെത്തിയതായി ഇന്ത്യൻ എംബസി അറിയിച്ചു.
അബൂട്ടി വള്ളില്‍ (38) എന്ന ന്യൂമാഹി സ്വദേശിയെയാണ് കഴിഞ്ഞ ഞായറാഴ്ച മുതല്‍ കാണാതായത്. റിയാദ് കിംഗ് ഖാലിത് വിമാനത്താവളത്തില്‍ വെച്ച്‌ ബോര്‍ഡിംഗ് പാസ് എടുത്തെങ്കിലും എമിഗ്രേഷൻ കഴിഞ്ഞിരുന്നില്ലായിരുന്നു. തുടര്‍ന്നാണ് കാണ്മാനില്ലെന്ന വിവരം ലഭിച്ചത്. തുടർന്ന് എംബസി നടത്തിയ അന്വേഷണത്തിലാണ് ജയിലിലാണെന്ന വിവരം പുറത്തുവന്നത്.
മസ്‌കറ്റിലെ വിസ മാറ്റുന്നതിനു വേണ്ടിയാണ് സൗദിയില്‍ എത്തിയത്. വിസ കിട്ടാത്തതിനെ തുടര്‍ന്ന് നാട്ടിലേക്ക് മടങ്ങുന്നതിനിടയില്‍ മതിയായ രേഖയില്ലാത്തതു കൊണ്ടാവാം പോലീസ് പിടിച്ചതെന്ന് സംശയിക്കുന്നതായി ന്യൂമാഹി പൊലീസ് ബന്ധുക്കളെ അറിയിച്ചു.
